Ինչո՞ւ է առողջապահության նախարարը մեկնել Մոսկվա

Առողջապահության նախարար Հարություն Քուշկյանի մամլո խոսնակ Շուշան Հունանյանը այսօր մեզ հետ զրույցում տեղեկացրեց, որ ապրիլի 27-ից Ռուսաստանի Դաշնության մայրաքաղաք Մոսկվայում ընթանում է Առողջապահության համաշխարհային կազմակերպության կողմից կազմակերպված առողջ ապրելակերպի և ոչ վարակիչ հիվանդությունների վերաբերյալ առաջին համաշխարհային նախարարական համաժողովը, որին մասնակցում է նաև ՀՀ առողջապահության նախարար Հարություն Քուշկյանը:
Նրա խոսքերով, ոչ վարակիչ հիվանդություններն ինչպես ամբողջ աշխարհում, այնպես էլ Հայաստանում հանդիսանում են բնակչության հաշմանդամության և մահացության բարձր ցուցանիշների պատճառ: Համաժողովի նպատակն է ընդգծել այդ հարցի արդիականությունը, ինչպես նաև դրա սոցիալ-տնտեսական ազդեցությունը:
Վերոհիշյալ համաժողովը նպատակ ունի աջակցել ԱՀԿ մասնակից-երկրներին` զարգացնելու ոչ վարակիչ հիվանդությունների կանխարգելման և առողջ ապրելակերպի խթանման ուղղությամբ տարվող ծրագրերը:
Համաժողովի ընթացքում կազմակերպվում են մի շարք նիստեր և կլոր սեղաններ, որոնց ժամանակ քննարկվում են ոչ վարակիչ հիվանդությունների վերահսկողության ու կանխարգելման միջազգային փորձը, ինչպես նաև տեղեկատվություն կտրամադրվի ոչ վարակիչ հիվանդությունների կանխարգելմանն ուղղված ազգային ծրագրերի, բազմոլորտ և նորարարական մոտեցումների վերաբերյալ:
«Համաժողովի ավարտին կընդունվի Հռչակագիր, որի շրջանակներում 2011 թ. սեպտեմբերին կկազմակերպվի ՄԱԿ-ի Գլխավոր ասամբլեայի «Առողջ ապրելակերպ և ոչ վարակիչ հիվանդությունների վերահսկողություն» բարձրաստիճան հանդիպումը:
Միաժամանակ, այս իրադարձությունը տարբեր բնագավառների ղեկավար անձանց միջև փորձի փոխանակման և նախաձեռնողական երկխոսությունների կազմակերպման բացառիկ հնարավորություն կընձեռի»,- ավելացրեց Շուշան Հունանյանը: