Եվրոպական հանձնաժողովն այսօր հրապարակելու է Եվրամիությանը անդամակցել ցանկացող երկրների վերաբերյալ տարեկան զեկույցները:
Թուրքիան ԵՄ անդամության թեկնածուներից է, սակայն պաշտոնական Բրյուսելը այդ երկրի հետ կապված դեռ բազմաթիվ խնդիրներ է տեսնում, մասնավորապես` Կիպրոսի չլուծված հարցը, Թուրքիայում մամուլի ազատության բացակայությունը և լրագրողների հետապնդումը:
Թուրքիայի վերաբերյալ հրապարակվելիք զեկույցն արդեն տեղադրված է Եվրոպական հանձնաժողովի պաշտոնական կայքում, ու չնայած Եվրահանձնաժողովն արձանագրում է, որ ավելացել են բաց և ազատ բանավեճերը այնպիսի զգայուն թեմաների վերաբերյալ, ինչպիսին հայկական ու քրդական հարցերն են կամ փոքրամասնությունների իրավունքները, այնուամենայնիվ, մամուլի ազատության վիճակը շարունակում է խնդրահարույց մնալ Թուրքիայում, հայտնում է Ազատություն ռադիոկայանը:
Զեկույցում ասված է, որ ահաբեկչության դեմ պայքարի և մամուլի մասին օրենքները «թուրքական ինքնությունը» վիրավորելու համար քրեական պատիժ նախատեսող տխհրահռչակ 301 հոդվածի հետ միասին օգտագործվել են Թուրքիայում մամուլի ազատությունը սահմանափակելու համար:
Մյուս խնդիրները, որ արծարծված են հրապարակվելիք փաստաթղթում, ներառում են դատական համակարգի անկախության հարցը, «Էրգենեկոն»-ի գործը, լրագրողների դեմ հարուցված քրեական գործերն ու մշակութային անկախության խնդիրները:
Սահմանադրական բարեփոխումները, որ Թուրքիայում այս տարվա սեպտեմբերին են անցկացվել և ուղղված են երկրի ժողովրդավարացմանը, Եվրահանձնաժողովը ընդհանուր առմամբ դրական է գնահատել, սակայն դիտորդները նշել են, որ կատարված փոփոխությունները կարող են տանել հասարակության իսլամականացմանը:
ԵՄ տարեկան զեկույցի վերաբերյալ թուրքական մամուլի արձագանքը Hurriyet Daily News պարբերականը բնորոշում է «խլացուցիչ լռություն» արտահայտությամբ` հավելելով, որ քննադատական այս զեկույցի առնչությամբ աղմուկի բացակայությունը խնդրահարույց է և ցույց է տալիս, որ թուրքական հասարակության շրջանում թուլացել է Եվրամիության հանդեպ հետաքրքրությունը: «Ցավոք սրտի, ոչ ոք այլևս լուրջ չի ընդունում Եվրամիությանը անդամակցելու գործընթացը», – մեկնաբանում է Hurriyet Daily News-ի հրապարակախոս Ֆերայ Թինչը: