«Ժառանգություն» կուսակցության փոխնախագահ Ռուբեն Հակոբյանը հայտարարեց, թե իր համար որպես քաղաքական մոտեցում ողջունելի է Կոնգրեսի և իշխանույթունների երկխոսությունը: Սակայն նա նշեց, որ անընդունելի է, երբ երկխոսում է Կոնգրեսը: Լրագրողի հարցին ի պատասխան` Հակոբյանը նշեց, որ իրենք չեն խանդում Կոնգրեսին, այլ պարզաբանեց, որ Կոնգրեսն արմատական դիրքորոշում ուներ, բացառում էր գործող իշխանությունների հետ երկխոսությունը` անվանելով նրանց թաթար-մոնղոլներ:
«Եթե որևէ մի ուժ կամ քաղաքական գործիչ, ով ծանոթ է քաղաքագիտական այբուբենին, գտնում է, որ պետության համար շատ կարևորագույն համազգային հարցերի հետ կապված կարող է նաև համագործակցել ոչ լեգիտիմ իշխանության հետ, ապա այդ ուժը դիտվում է կեղծ ընդդիմություն»,- հայտարարեց Հակոբյանը` հավելելով. «Փառք Աստծո, այսօր այդ ուժն արդեն սկզբունքորեն փոխել է իր դիրքորոշումը, և սկզբունքային պայքար է հայտարարել իր իսկ կողմից ստեղծված, գրած այդ սկզբունքների դեմ, և մյուս կողմից` հնարավորություն է ստեղծվում, որ իսկապես իրական ընդդիմադիր ուժերը, որոնք ոչ թե անձնական ու կուսակցական, եսակենտրոն հարցեր են լուծում, ճիշտ գնահատեն իրավիճակը և գտնեն համագործակցության եզրեր, որովհետև այսօր որևէ քաղաքական ուժ չպետք է հավակնի, որ միայնակ կարող է հանել պետությունն այս իրավիճակից: Ես գնահատական չեմ ուզում տալ, ես ողջունում եմ ցանկացած երկխոսություն»:
Հակոբյանը կարծում է, որ բացի այս, իշխանությունների վրա էլ դրսից կան ճնշումներ, ուստի նրանք այդ քայլին գնացին նաև ճնշումների հետևանքով:
