Ընդերքի մասին օրենքում իրականացվող փոփոխությունների փաթեթը, որը գտնվում է ԱԺ-ում, ենթադրում է նաև հարկման փոփոխություններ: Այս մասին այսօր լրագրողների հետ հանդիպման ժամանակ ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը: «Դրանց շնորհիվ էապես մեծանալու է նաև այս ոլորտից բյուջե գանձվող հարկային եկամուտների չափը` մոտ 2-2.5 անգամ»,- հայտարարեց Գ. Մինասյանը` հավելելով, որ երեկ ՀՀ նախագահի և հանքարդյունաբերության ոլորտի ներկայացուցիչների հանդիպման ժամանակ արձանագրվեց, որ առաջիկա 2-3 տարիներին այս ոլորտում մենք կունենանք առնվազն կրկնակի աճ:
«Իսկ սա չափազանց կարևոր է, քանի որ մենք այս պարագայում վերջապես հնարավորություն կունենանք ունենալ սեփական պղնձաձուլարան, որը թույլ կտա ավելի խորը մշակում իրականացնել, ոչ թե կիսատ վերամշակման արդյունքը ուղարկել արտասահման: Սա ևս որակական փոփոխություն կարող է ունենալ մեր տնտեսության համար»,- ասաց Գ. Մինասյանը:
Հարցին, թե ինչի՞ հաշվին է ապահովվելու հանքարդյունաբերության ոլորտից 2-2.5 անգամ հարկման ծավալների աճը, Գ. Մինասյանը պատասխանեց, որ ընդերքի մասին օրենքում լինելու են ձևակերպումներ, որոնք կապելու են միջազգային շուկայում պղնձի գների աճը հարկման ճավալների հետ:
«Մեր օրենսդրությունը այսօր չի արձագանքում այն իրավիճակին, երբ միջազգային շուկաներում հանքահումքային ապրանքների գները էապես բարձրանում են: Սա բացասական ազդեցություն է թողնում ինչպես պետական բյուջեի եկամուտների, այնպես էլ մրցակցային իրավիճակի վրա: Աշխարհի շատ երկրներ, որոնք ունեն հումքային արտադրանք, նրանք ռոյալթիի կամ բնապահպանական վճարների ճանապարհով կարգավորում են այս խնդիրը, որպեսզի լինեն ոչ թե գերշահույթներ, այլ տրամաբանական շահույթներ:
Ընդերքը համաժողովրդական սեփականություն է, և այստեղից է բխում այդ օրենսդրության տրամաբանությունը: Եթե միջազգային շուկայում ունենք գների` որոշակի սահմանից ավելի բարձր աճ, ապա այդ գերշահույթները պետք է բաշխվեն ինչպես այդ տնտեսվարող սուբյեկտների, այնպես էլ պետության միջև»,- հայտարարեց Գ. Մինասյանը:
Հարցին, թե ինչպիսի՞ համամասնությամբ պետք է բաշխվեն այդ գերշահույթները տնտեսվարողների և պետության միջև, Գ. Մինասյանը դժվարացավ պատասխանել: «Ես առայժմ չեմ ուզում այս մասին հստակ հայտարարել, քանի որ այդ օրենքի նախագիծը դեռ քննարկվելու է ԱԺ-ում»,- ասաց Գ. Մինասյանը:
