Տարածքային ընտրություններում ֆրանսիական «Ազգային ճակատ» կուսակցության հաղթանակը կարող է 1.5 տարուց աղետի վերածվել եվրոգոտու համար՝ գրում է Fortune-ը։
Ֆրանսիայի 12 տարածաշրջաններից 6-ում աջ կուսակցությունը, որը գլխավորում է Մարին Լե Պենը, առաջատար է դարձել։ Ազգային մասշտաբով նրան աջակցել է ընտրողների 27.7 տոկոսը։
Եվրոպական բարեփոխումների կենտրոնի հետազոտությունների բաժնի ղեկավար Սայմոն Թիլֆորդի խոսքով՝ նման արդյունքները ցույց են տալիս վիթխարի ճեղքվածք երկրի էլիտայի և բնակչության միջև, որը դեմ է հանդես գալիս էլիտայի կողմից մշտապես ցանկալի եվրաինտեգրմանը։
Ներկայում եվրոգոտու երկրները ձգտում են հավասարակշռել իրենց բյուջեն և նվազեցնել պարտքի մակարդակը։ Գերմանիան դժգոհ է, որ Ֆրանսիայի նախագահ Ֆրանսուա Օլանդը Փարիզի հարձակումներից հետո անվտանգության ծախսերն ավելի կարևոր է համարում բյուջեի կրճատման ծրագրերից։
Սակայն Բեռլինը փորձում է իր դժգոհությունը չարտահայտել՝ իմանալով, որ դա շահավետ կլինի Մարին Լե Պենի կուսակցության համար, ով հաստատում է, որ Ֆրանսիան ղեկավարվում է գերմանացիների կողմից։
Թիլֆորդը կարծում է, որ Մարին Լե Պենը նախագահի պաշտոնում վատագույն սցենարներից մեկը կլինի, քանի որ նա պահանջներ կառաջադրի եվրոգոտուն, որոնք Գերմանիան երբեք չի ընդունի։ Նա ընդգծում է, որ եթե իրավիճակը չփոխվի, ապա ժամանակի ընթացքում եվրոպական քաղաքականությունն ու տնտեսությունը կհայտնվեն «ֆաշիստների» իշխանության տակ, ովքեր բացարձակապես չեն ցանկանում հաշտվել Եվրոպայի ներկայիս կարգավիճակի հետ։