Կիպրոսի նախագահ Դիմիտրիս Խրիստոֆիասը եւ թուրք կիպրոսցիների առաջնորդ Դերվիշ Էրողլուն Եվրահանձնաժողովի` ընդլայնման հարցերով հանձնակատար Շտեֆան Ֆուլեի մասնակցությամբ բացել են հերթական` յոթերորդ անցակետը, որը միացնում է Կիպրոսի Հանրապետությունն ու չճանաչված Հյուսիսային Կիպրոսի Թուրքական Հանրապետությունը: Այս անցակետերը տեղակայված են Կիպրոսի երկու մասերի միջեւ ընկած տարածքում, որը վերահսկվում է ՄԱԿ-ի խաղաղապահների կողմից:
Անցակետը թույլ կտա կիպրոսցիներին եւ թուրքերին հեշտությամբ հատելու շփման գիծը: Կիպրոսի կառավարության ներկայացուցչի խոսքերով, անցակետի բացումը երկու կողմերի մի քանի ամսվա ջանքերի շնորհիվ է տեղի ունեցել:
Այս պահին էլ կիպրոսական երկու մասերի ներկայացուցիչները բանակցություններ են վարում` կղզին մեկ պետական միավորի մեջ միավորելու ուղղությամբ: