Երեկ իշխող «ԲԱԱՍ» կուսակցության 203 անդամներ լքել են կուսակցության շարքերը` դրանով իրենց բողոքն արտահայտելով հակակառավարական ցույցերի նկատմամբ կիրառվող բռնությունների դեմ: Այս մասին հաղորդում է France Presse գործակալությունը:
Կուսակցության շարքերը լքել են հարավային Հաուրանի շրջանի կուսակցականները, որտեղ գտնվում է Դարա’ա քաղաքը` գործող ռեժիմի դիմադրության հիմնական կենտրոնը: Ավելի վաղ մենք հայտնել էինք 30 կուսակցականների հեռանալու մասին:
«Անվտանգության ծառայությունները քանդել են այն արժեքները, որոնցով մենք մեծացել ենք: Մենք մերժում և դատապարտում ենք այն, ինչ կատարվել է, և հայտարարում ենք առանց ափսոսանքի կուսակցությունից դուրս գալու մասին»,- ասվում է հայտարարության մեջ: Նրանք նաև դատապարտել են որոշ սիրիական լրատվամիջոցների, որոնք ցուցարարներին անվանել են «զինված հանցագործների բանդաներ»:
Երեկ նաև հայտնի է դարձել, որ Սիրիայում տեղի ունեցող իրադարձությունների վերաբերյալ բացատրություններ տալու համար այդ երկրի դեսպաններին Եվրամիության հինգ երկրներում կանչել են այդ երկրների արտաքին գործերի նախարարություններ և վճռական բողոք արտահայտել Սիրիայում իրավիճակի սրման կապակցությամբ, որտեղ կառավարությունը բանակն օգտագործում է հակակառավարական բողոքները ճնշելու համար: Այս մասին հաղորդում է Franec Presse գործակալությունը:
Այդ երկրներն են Ֆրանսիան, Մեծ Բրիտանիան, Իտալիան, Գերմանիան և Իսպանիան: «Մենք հիշեցրել ենք դեսպանին, որ Սիրիայի իշխանությունները պետք է ընդառաջ գնան սեփական ժողովրդի ցանկություններին, որոնք պահանջում են բարեփոխումներ` միաժամանակ չկիրառելով զինվծ ուժերը», գործակալությանն ասել են Ֆրանսիայի արտաքին գործերի նախարարությունում:
