Միացյալ ազգերի կազմակերպության Անվտանգության խորհուրդը երեկ չի կարողացել բանաձև ընդունել, որով կդատապարտվեին Սիրիայի իշխանությունների գործողություններն ընդդեմ խաղաղ բնակչության: ԱԽ նիստը տևել է ավելի քան երկու ժամ, սակայն ոչ մի փաստաթուղթ չընդունվեց, իսկ կողմերը սահմանափակվեցին ելույթներով, որոնցում ներկայացրին ԱԽ անդամ երկրների դիրքորոշումները: Այս մասին հաղորդում է RIA-Novosti գործակալությունը:
Մենք տեղեկացրել էինք, որ Մեծ Բրիտանիան, Գերմանիան, Պորտուգալիան և Ֆրանսիան պահանջում էին, որ կոշտ դիրքորոշում ընդունվի և դատապարտվի Սիրիայի իշխանության քաղքականությունն ընդդեմ սեփական քաղաքացիների: Սակայն քանի որ ԱԽ անդամներից մեկը` Լիբանանը, կտրուկ դեմ էր նման դիրքորոշմանը, ԱԽ նիստն անցավ բաց:
Ռուսաստանն էլ իր հերթին դեմ է եղել Սիրիայի ներքին գործերին միջամտության որևէ առաջարկի: Այս մասին ասել է ՄԱԿ-ում Ռուսաստանի մշտական ներկայացուցիչ Ալեքսանդր Պանկինը, որը նշել է, որ Սիրիայում ներքաղաքական հակամարտությունը չի սպառնում միջազգային անվտանգությանը, և արտաքին միջամտության կարիք չկա` ավելացնելով, թե պետք է հաշվի առնվի այն հանգամանքը, որ «ուժի կիրառումն ամենևին էլ չի կրում միակողմանի բնույթ»:
Մինչդեռ այսօր Եվրամիությունը պատրաստվում է քննարկել Սիրիայի դեմ պատժամիջոցների կիրառման հարցը: Եվրամիության արտաքին գերատեսչության ղեկավարի օգնական Մայքլ Միլանը լրատվամիջոցներին հաղորդել է, որ «քննարկվում են բոլոր հնարավոր տաբերակները»:
