Միջազգային դիտորդական առաքելությունների ներկայացուցիչները (ԵԱՀԿ, ԵԽ և Եվրախորհդարան) լրագրողների հետ հանդիպման ժամանակ Ադրբեջանում կայացած խորհրդարանական ընտրությունների արդյունքների վերաբերյալ զեկույց են ներկայացրել, ինչը մեծ աշխուժություն է առաջացրել ներկա լրագրողների շրջանում: Այս մասին տեղեկացնում է Turan լրատվական գործակալությունը:
Երբ առաքելության ներկայացուցիչներից մեկը խոսել է Ադրբեջանում առկա կայուն իրավիճակի մասին, դա ԶԼՄ-ի ներկայացուցիչների ծիծաղն է առաջացրել:
Լրագրողների սուր հարցերին դիտորդական առաքելության ներկայացուցիչները չեն պատասխանել: Այնուհետև ադրբեջանցի լրագրողներից մեկն ասել է, թե իրենք ցանկանում են, որ դիտորդների երկրներում էլ այնպիսի «ժողովրդավարություն» լինի, ինչպիսին որ Ադրբեջանում է, ինչին դիտորդները ժպիտով են «պատասխանել»:
Դիտորդական առաքելության զեկույցն ու գնահատականը այնքան են զայրացրել լրագրողներին, որ երկրում տեղեկություններ են շրջանառվում այն մասին, թե դիտորդական առաքելության ներկայացուցիչներին կաշառել են: Լրագրողների հետ հանդիպման ընթացքում առաքելության ղեկավար Օդրի Գլովերը հայտարարել է, թե իրեն ոչինչ չեն առաջարկել, և նա ոչինչ չի ստացել:
