«7-ի գործով» փաստաբան Մելանյա Առուստամյանը ասաց, որ Մարտի 1-ի գործերի քննությանը նոր թափ հաղորդելու Սերժ Սարգսյանի հանձնարարականին ցանկանում է հավատալ, բայց մինչև չտեսնի գործը, չի կարող որևէ գնահատական տալ:
«Առաջին լրատվական»-ի հետ զրույցում Առուստամյանը նկատեց, որ այժմ ՀՔԾ-ի հետ համագործակցելու կարիք ինքը չի տեսնում, քանզի Մարտի 1-ին վերաբերող իր բոլոր գործերը գտնվում են Եվրոպական դատարանում:
Առուստամյանի գնահատմամբ, Եվրոպական դատարան ուղարկված դիմումներն են պատճառը, որ իշխանությունները ցանկանում են փոխել իրավիճակը. «Այն գործերը, որոնք գտնվում են եվրոդատարանում, ազդում են պետության վրա: Եթե պետությունը դատավարական իրավունքի ոլորտում իրականացրած իր սխալները ընդունի, բնականաբար, դա և՛ պետությանն է օգտակար, և՛ իմ պաշտպանյալներին»:
Առուստամյանը նկատեց, թե ինքը երբեք էլ չի ցանկացել, որ իր գործերն ուղարկվեն Եվրոպական դատարան:
