Վերջերս շատ հաճախ տեղեկություններ են ստացվում Ռուսաստանից, համաձայն որոնց, այդ երկրում աճում է «սերն ու հարգանքը» նախկին դիկտատորների նկատմամբ: Հիտլերի ծննդյան օրը նացիստները երթեր են կազմակերպում կամ կենտրոնական փողոցներից մեկում կախում են նրա նկարով մեծ պաստառ, Լենինի ծննդյան օրը հարցումները ցույց են տալիս, որ երիտասարդներն ավելի մեծ ակնածանքով են սկսել վերաբերվել Լենինին: Իսկ այսօր հրապարակված տվյալները վերաբերում են Ստալինի նկատմամբ աճող հետաքրքրությանը:
Ռուսական «ՎՑԻՕՄ» հասարակական կարծիքի ուսումնասիրման կենտրոնի կողմից անցկացված հարցումը ցույց է տվել, որ երկրի նախագահին կից խորհրդի կողմից առաջ քաշված «դեստալինիզացիայի» գաղափարը աջակցություն չի ստանում բնակչության մեջ: Ըստ այդ հարցումների` եթե 2007 թ. ռուսատանցիների միայն 15%-ն էր կարծում, որ Ստալինը «երկրի համար շատ դրական գործեր է արել», ապա հիմա այդ թիվը կազմում է 26%: Ընդ որում, այդ 26%-ից 3%-ն այս «բանակին են» միացել վերջին երեք ամիսների ընթացքում, երբ ավելի շատացել են խոսակցությունները «դեստալինիզացիայի» մասին: Պակասել է նաև սովետական ժողովրդի մեծ առաջնորդի հակառակորդների թիվը: 2007 թ. նրանք կազմում էին 33%, 2011թ. հունվարին` 27%, իսկ ապրիլին` 24%:
Բացի այդ, հարցվածների 45%-ը կարծում է, որ «դեստալինիզացիա» անհրաժեշտ չէ, քանի որ դա կհանգեցնի խոսքի ազատության սահմանափակմանը, կաղավաղի ռուսաստանցիների պատմական գիտակցությունը, այն միակողմանի կդարձնի: Մինչդեռ ընդամենը 26%-ն է կարծում, որ Ռուսաստանը չի կարող հեռու գնալ, քանի դեռ չի վերաիմաստավորել իր անցյալը: Փորձագետները նշում են, որ Ստալինի նկատմամբ հետաքրքրությունն աճում է այն ժամանակ, երբ դժգոհություն կա իշխանություններից: Ստալինը բնակչության մեջ ունի դաժան և կոպիտ, բայց միևնույն ժամանակ հայրենասեր և ոչ կոռումպացված գործչի համբավ:
Վերջին օրերին Ռուսաստանում մեծ աղմուկ է բարձրացրել նաև հասարակական որոշ կառույցների այն նախաձեռնությունը, համաձայն որի, մայիսի 9-ին երթուղային տաքսիներն անհրաժեշտ է զարդարել Ստալինի նկարներով: Իրավապաշտպանները սա սադրանք են համարում: