Ելույթ ունենալով Կոպնեհագենում` Ռուսաստանի Դաշնության վարչապետ Վլադիմիր Պուտինը հայտարարել է, որ ոչ մի երկիր իրավունք չունի սպանել Լիբիայի առաջնորդին: Այս մասին հաղորդում է RIA-Novosti գործակալությունը:
«Ասում էին` չենք ցանկանում սպանել: Հիմա որոշ պաշտոնայներ ասում են. «Այո, մենք ձգտում ենք վերացնել Քադաֆիին»: Իսկ ո՞վ է ձեզ թույլ տվել: Դա՞տ է եղել: Ո՞վ է այդ իրավունքը ստացել` մահապատժի ենթարկելու մարդուն, ով էլ որ նա լինի»,- ասել է Պուտինը` պատասխանելով այն հարցին, թե ինչու է ինքը Լիբիայի դեմ գործողություններն անվանել «խաչակրաց պատերազմ»:
«Ի՞նչ օդային տարածքի փակելու մասին է խոսքը, եթե ամեն երեկո նրանք ռմբակոծում են պալատները»,- ասել է Պուտին: Նրա խոսքերով` ամեն ինչ պետք է արվի միջազգային օրենքի շրջանակում, իսկ ներկայիս գործողությունները Լիբիայում նա անվանել է պայքար Լիբիայի նավթագազային հարստությունների համար:
Այս հայտարարությունը հաջորդել է Մեծ Բրիտանիայի պաշտպանության նախարար Լիամ Ֆոքսի այն պնդմանը, թե Քադաֆին խոչընդոտ է հակամարտության խաղաղ կարգավորման համար` մանրամասնելով, որ ցանկացած ոք, ով խաղաղ բնակչության վրա հարձակման հրաման է տալիս, կհամարվի ՆԱՏՕ-ի ինքնաթիռների համար «օրինական թիրախ»:
Պուտինի այս հայտարարությունից հետո Լիբիան անմիջապես Ռուսաստանին խնդրել է հրավիրել ՄԱԿ ԱԽ արտահերթ նիստ: Այս մասին հաղորդում է լիբիական JANA գործակալությունը: Հաղորդագրության մեջ նշվում է, որ քննարկման թեմա պետք է դառնա «գաղութարարների և խաչակիրների չափից դուրս մեծ ագրեսիան»` նշելով, որ «հակառակ Անվտանգության խորհրդի բանաձևերին և միջազգային օրենքներին՝ հարվածների թիրախ են դառնում քաղաքացիական օբյեկտներն ու Մուամար Քադաֆին»:
Ավելի ուշ ԱՄՆ և Մեծ Բրիտանիայի պաշտպանության նախարարներ Ռոբերտ Գեյթսն ու Լիամ ֆոքսը հայտարարել են, որ կոալիցիան իր առջև նպատակ չի դրել ֆիզիկապես ոչնչացնելու Քադաֆիին, ինչպես նաև Սիրիայում ռազմական միջամտություն իրականացնելու, քանի որ իրենք հասկանում են, որ հնարավորությունները սահմանափակ են. «Մենք չենք կարող միշտ ամեն ինչ անել: Մենք պետք է հասկանանք, որ կան սահմաններ, որից ավելին մեր երկրները չեն կարող անել»,- ասել է Ֆոքսը:
Հիշեցնենք նաև, որ երկու շաբաթ առաջ Ռուսաստանի վարչապետի հայտարարությունները առաջացրել էին ՌԴ նախագահ Դմիտրի Մեդվեդևի լուրջ դժգոհությունները, որն այդ ամենն անթույլատրելի էր համարել: