Թուրքական Cumhuriyet թերթի փոխանցմամբ, վարչապետ Էրդողանը վարչապետական ապարատում ընդունել է Ղրղզստանի վարչապետ Ասլանբեկ Աթամբաևին, իսկ արտգորնախարար Ահմեդ Դավութօղլուն` իր ղրղզ գործընկեր Ռուսլան Կազակբաևին: Հանդիպումների ժամանակ կողմերը քննարկել են երկու երկրների միջև անցագրային ռեժիմի վերացման հարցը:
Արդյունքում, ստորագրվել է երկու երկրների քաղաքացիների համար 90 օրով առանց անցագրային ռեժիմի այցի մասին համաձայնագիրը: Բացի այդ, պայմանագիր է ստորագրվել ռազմավարական համագործակցության բարձրագույն խորհրդի ստեղծման մասին, որը կվճռի երկու երկրների միջև փոխհարաբերությունների ռազմավարությունը: Փաստորեն, ԱՊՀ տիրույթում Ղրղզստանը Ռուսաստանից հետո դարձավ երկրորդ երկիրը, որի հետ Թուրքիան ստեղծել է նմանատիպ խորհուրդ:
Ստեղծվելու է նաև ռազմավարական պլանավորման համատեղ խումբ:
Էրդողանը խոստացել է Ղրղզստանին հատկացնել 61 միլիոն դոլար: Դրան պետք է հավելել այն, որ փետրվարին Ղրղզստան կատարած այցի ժամանակ Էրդողանը խոստացել էր հատկացնել 10 միլիոն դոլար: Այսինքն՝ Թուրքիան այս տարի Ղրղզստանին հատկացնելու է 71 միլիոն դոլար:
Էրդողանը նաև հանդիպում է ունեցել ղրղզ գործարարների հետ և նշել, որ առաջիկա 5 տարիների ընթացքում Ղրղզստանի հետ ապրանքաշրջանառությունը հասցվելու է 1 միլիարդ դոլարի:
Հիշեցնենք, փետրվարյան այցի ժամանակ Էրդողանը խոստացել էր 450 միլիոն դոլարի ներդրում անել Ղրղզստանում և վերջինիս ավերված հարավային հատվածի վերականգնման համար հատկացնել 15 միլիոն դոլարի օգնություն:
2008 թվականին երկու երկրների միջև ապրանքաշրջանառությունը կազմել է 240 միլիոն դոլար, 2009 թվականին` 110 միլիոն դոլար, 2010 թվականին` 107 միլիոն դոլար: Ընդ որում` թուրքական արտահանումը կազմել էր 77 միլիոն դոլար, իսկ ներկրումը` 30 միլիոն դոլար: