ԱՄՆ-ում հրապարակվել են Ջորջ Բուշ կրտսերի հուշերը: «Decision Points» («Որոշումների ընդունման պահերը») վերնագիրը կրող գիրքը վաճառքի է հանվել նոյեմբերի 9-ին, հայտնում է lenta.ru-ն: Գրքի լույս ընծայման նախօրյակին ԱՄՆ նախկին նախագահը Սպիտակ տունը լքելուց հետո առաջին անգամ մեծ հարցազրույց է տվել NBC News-ին: Այնտեղ նա, մասնավորապես, պատմել է, թե ինչ հանգամանքներում է ահաբեկիչների հանդեպ խոշտանգման դաժան մեթոդների կիրառման թույլտվություն տվել: Դա, ըստ Բուշի, տեղի է ունեցել միայն այն բանից հետո, երբ իրավաբանները հաստատել են հիշյալ մեթոդների օրինական լինելը:
43-րդ նախագահ Ջորջ Բուշը նաև ասել է, որ 2001թ. սեպտեմբերի 11-ի ահաբեկչական գործողությունները կանխել հնարավոր չէր, և որ ԱՄՆ հատուկ ծառայությունները հավաստի աղբյուրներից տեղեկությունների չեն տիրապետել գալիք հարձակումների մասին:
14 գլուխներից բաղկացած, 477-էջանոց մեմուարների ամենահետաքրքիր դրվագներից մեկն էլ, mignews.com-ի փոխանցմամբ, մերձավորարևելյան հակամարտության լուծման մասին պատմող հուշերն են: Բուշը պատմել է, որ Էհուդ Օլմերտի` Իսրայելի վարչապետի պաշտոնից հեռանալուց առաջ վերջինս և Պաղեստինի առաջնորդ Մահմուդ Աբասը պատրաստ են եղել հայտարարել խաղաղության համաձայնագրի ստորագրման մասին, սակայն Օլմերտի հրաժարականը թույլ չի տվել վերջակետ դնել հակամարտությանը:
Կարգավորման պլանը, որն առաջարկվել էր Իսրայելի վարչապետի կողմից և մյուս կողմերի հավանությանն արժանացել, ներառում էր «Արևմտյան ափի մեծ մասի վերադարձը պաղեստինցիներին, Արևմտյան ափը Գազայի հատվածին կապող թունելի շինարարությունը, Իսրայելում պաղեստինցի փախստականների սահմանափակ թվի ընդունումը, Երուսաղեմում համատեղ մայրաքաղաքի ստեղծումը, ինչպես նաև Հին քաղաքի սուրբ վայրերի փոխանցումը միջազգային կառավարման»:
