ՄԱԿ-ի Անվտանգության խորհուրդը արդեն նախնականորեն քննարկում է իրավիճակը Սիրիայում, որտեղ մի քանի շաբաթ է՝ իշխանությունները դաժանորեն ճնշում են հակակառավարական ելույթները, սակայն պայմանավորվածություն դեռ չկա, թե ինչ ձևով արձագանքեն այդ իրադարձություններին: Այս մասին երեքշաբթի օրը հայտարարել է ՄԱԿ-ի գլխավոր քարտուղար Պան Գի Մունը,- հաղորդում է Reutrs գործակալությունը:
«ՄԱԿ-ի ԱԽ անդամները դեռ շարունակում են քննարկումները, թե ինչ հայտարարություն կարող են անել Սիրիայի իրավիճակի վերաբերյալ»,- ասել է գլխավոր քարտուղարը: «Մենք շատ ուշադիր հետևում ենք իրավիճակին, և մտահոգությունն աճում է: Ես դատապարտում եմ խաղաղ ցուցարարների դեմ բռնության կիրառումը, հատկապես` հրազենի և տանկերի օգտագործումը, ինչի հետևանքով հարյուրավոր մարդիկ են սպանվել ու վիրավորվել»,- ասել է Պան Գի Մունը:
ՄԱԿ ԱԽ նախագահող, Կոլումբիայի ներկայացուցիչն այդ կազմակերպությունում հայտարարել է, որ Սիրիայի հարցի քննարկումը նախատեսված է չորեքշաբթի օրը:
Իր հերթին Ֆրանսիայի նախագահ Նիկոլա Սարկոզին դատապարտել է Սիրիայում տեղի ունեցող բռնությունները և պաշտպանել ցուցարարներին. «Չի կարելի ցուցարարների դեմ տանկերով և թնդանոթներով դուրս գալ»,- ասել է Սարկոզին` նշելով, որ Սիրիայում անընդունելի իրավիճակ է: Նա միաժամանակ ասել է, որ ցանկացած հակազդեցություն այս ամենին հնարավոր է միայն ՄԱԿ-ի սանկցիայով:
