«Այդ հայտարարությունը զուտ քաղաքական բնույթ է կրում և իրավաբանության հետ որևէ առնչություն չունի, և եթե ցանկություն լինի Մարտի 1-ի գործով իրական բացահայտումներ կատարելու, իհարկե դա հնարավոր է և նույնիսկ շատ դեպքերում պարզ է, թե ովքեր են կազմակերպիչները և կատարողները»,- «Առաջին լրատվականի» հետ զրույցում, անդրադառնալով Սերժ Սարգսյանի հանձնարարականին` նոր թափ հաղորդել Մարտի 1-ի գործերի քննությանը, կարծիք հայտնեց «7-ի գործով» փաստաբան Լուսինե Սահակյանը:
Սահակյանը նշեց, որ եթե այդ հարցաքննությունները կրելու են ձևական բնույթ, ապա իհարկե չի բացահայտվելու մարտի 1-ի իրական պատկերը:
Սահակյանի խոսքերով, ինքն այժմ չի պատրաստվում համագործակցել ՀՔԾ-ի հետ, քանզի դրա կարիքը չկա, բացի դրանից` չկա այն անձը, որի շահերի ներկայացմամբ ինքը պետք է հանդես գա. «Ես տվյալ գործով հանդես եմ եկել որպես պաշտպան, և դատական նիստերի ընթացքում մենք ներկայացրել ենք գործի նյութերը, այն ուղղությունները, որոնցով հնարավոր է բացահայտել այդ գործը: Այժմ ՀՔԾ-ի հետ համագործակցելու կարիքը չեմ տեսնում»: