«Առաջին լրատվական»-ի զրուցակիցն է Վրաստանի նախագահ Միխաիլ Սաակաշվիլիի խորհրդական Վան Բայբուրդի հետ:
– Ինչպե՞ս կմեկնաբանեք Վրաստանի խորհրդարանի վերջին որոշումը: Ձեր կարծիքով, այն ինչպե՞ս կանդրադառնա Հայաստանի վրա:
– Երբ 2008թ. Ռուսաստանը հարձակվեց Վրաստանի վրա, այդ պայմանագիրն, ըստ էության, այլևս չէր գործում: Այնպես որ, Վրաստանի խորհրդարանի որոշումն ամենևին էլ նոր վիճակ չստեղծեց: Միևնույն է, պայմանագիրը երկու տարի է` չէր գործում, ավելին` այս տարի արդեն այդ պայմանագրի ժամկետն, այսպես, թե այնպես, ավարտվելու էր: Այնպես որ, ես կարծում եմ` այդ պայմանագրի կասեցումը չի անդրադառնա Հայաստան-Վրաստան հարաբերությունների վրա: ՌԴ-ն Վրաստանի վրա հարձակմամբ ու նման քայլերով արկածներ է որոնում: Ու հիմա, իր ռազմակայանի համար էլ քայլեր կփնտրի: ՌԴ-ն մինչև չի փչացրել հարաբերությունները Թուրքիայի, Պարսկաստանի հետ, հանգիստ չի նստել: Բայց կարծում եմ` հայ-վրացական հարաբերությունների վրա սա չի ազդի: Հայաստանի ու Վրաստանի բարձրաստիճան պաշտոնյաների, գերատեսչությունների հարաբերությունները միշտ էլ ջերմ են եղել:
– Հայաստանում ՀՀԿ-ական պատգամավորներից ոմանք մտավախություն հայտնեցին, որ Վրաստանի խորհրդարանի որոշմամբ տարածաշրջանում իրավիճակը կարող է ապակայունացվել, և որ պետք չէր նման քայլի գնալ:
– Ռուսական բազան եթե չմատակարարվի, կարծում եմ` տարածաշրջանում իրավիճակը հակառակը կլինի: Ես կարծում եմ` Վրաստանի խորհրդարանի այս որոշումը չի ազդի տարածաշրջանի կայունության, Հայաստանի և Վրաստանի հանրապետությունների անվտանգության վրա:
– Ձեր կարծիքով, ՌԴ-ն արդյո՞ք այսքանից հետո կփորձի տարածաշրջանում ինչ-որ գործողություններ հրահրել` իրավիճակն ապակայունացնելու համար:
– Ե՜վ ես, ե՜ւ ինձ նման Վրաստանում շատերն են համոզված, որ Հայաստանը երբեք թույլ չի տա ուրիշներին իր տարածքից հարևան երկրի դեմ գործողությունների դիմել: Հայաստանը երբեք թույլ չի տա, որ իր հարևան, եղբայրական երկրի դեմ ռուսական ռազմաբազաներից ինչ-որ քայլեր անեն: Բայց իհարկե, ՌԴ-ից ամեն ինչ էլ սպասելի է:
– Նախորդ շաբաթ Հայաստանում էր Վրաստանի պաշտպանության նախարարը, այսօր Վրաստանի արտգործնախարարն է այցելում Երևան: Իրար հաջորդող այս այցերն ինչո՞վ են պայմանավորված, և այստեղ ռուս-վրացական պայմանագրի կասեցումը որևէ դերակատարություն ունի՞, թե՞ ոչ:
– Այս այցերն ամենևին էլ կապված չեն այդ փաստաթղթի հետ: Այս այցերը մի քանի ամիս առաջ են ծրագրված եղել` համաձայն արարողակարգի: Եվ բացի այդ, կրկնում եմ, 2008թ. Վրաստանի դեմ ռուսական ագրեսիայից հետո բոլորի համար էլ պարզ էր, որ ՌԴ–ն չէր կարող Վրաստանի հետ կնքած այդ պայմանագիրն իրացնել: Այսինքն` երկու տարի շարունակ այդ պայմանագիրը չէր գործում, ուստի Վրաստանի խորհրդարանի որոշումը պարզապես ֆորմալ բնույթ կրեց: Ընդհանրապես, Վրաստանը մարդասիրական քայլեր շատ է արել Ռուսաստանի հանդեպ, սակայն դրա պատասխանը մյուս կողմից մենք չենք տեսել: Ռուսաստանի քաղաքացիները շատ ազատ ու հանգիստ կարող են այցելել Վրաստան, անցնել Վրաստանով, սահմանի մոտ որևէ խոչընդոտ չի հարուցվում: Փոխարենը` Վրաստանի քաղաքացիների համար անհնար է ՌԴ մտնելը: Այդ երկրի մուտքի արտոնագիր ստանալը Վրաստանի քաղաքացու համար պարզապես հրաշք կլինի: Էլ չեմ ասում, որ ՌԴ–ից Վրաստան եկողների համար ինչ անհաղթահարելի խոչընդոտներ են ստեղծում. խոչընդոտներ ե՜ւ ՌԴ քաղաքացիների, ե՜ւ Հյուսիսային Կովկասի իքնավար հանրապետությունների քաղաքացիների համար: Ահա սա է ՌԴ–ն:
