Հայաստանի Հանրապետության Քրեական օրենսգրքում փոփոխություններ և լրացումներ կատարելու մասին օրենքի նախագծով առաջարկվում է փոփոխություն կատարել նաև 104-րդ հոդվածում (սպանություն)` հոդվածի 1-ին մասով որպես պատիժ սահմանել ազատազրկում ութից տասնհինգ տարի ժամկետով, նախկին վեցից տասներկուսի փոխարեն, իսկ 2-րդ մասով ազատազրկում` տասներկուսից քսան տարի ժամկետով կամ ցմահ ազատազրկում՝ նախկին ութից տասնհինգ տարի ժամկետով կամ ցմահ ազատազրկման փոխարեն:
Քրեական իրավունքի և քրեական օրենսդրության հիմնարար սկզբունքն արդարության սկզբունքն է: Եթե դրանք չհամապատասխանեն, ապա այն չի կարող դաստիարակչական ազդեցություն ունենալ: Արդարության սկզբունքը առաջին հերթին ենթադրում է, որ քրեական օրենքով նախատեսված պատիժը պետք է համապատասխանի կատարված հանցագործության և այն կատարող անձի հանրային վտանգավորությանը:
Հանցագործության հանրային վտանգավորության հիմնական ցուցանիշներից մեկն այն օբյեկտն է, որի դեմ ուղղված է հանցագործությունը: Այս տեսանկյունից ՀՀ Քրեական օրենսգրքում առկա այն իրավիճակը, երբ սպանության համար ավելի մեղմ պատիժ է նախատեսված, քան ավազակության համար, որը սեփականության դեմ ուղղված հանցագործություն է, ոչ մի քննադատության չի դիմանում: Բացի նշվածից, ծանրացուցիչ հանգամանքներում սպանության համար առավելագույնը 20 տարի ժամկետով ազատազրկում նախատեսելը կվերացնի այն անհամամասնությունը, որն առկա է ներկայումս. առավելագույնը 15 տարի ժամկետով ազատազրկման և ցմահ ազատազրկման միջև. առավել ևս, որ գործող օրենքը հնարավորություն է տալիս ցմահ ազատազրկման դատապարտվածին 20 տարի պատիժը կրելուց հետո պատժի կրումից պայմանական-վաղաժամկետ ազատվել:
