«ԱՊՀ-ն և առաջին հերթին` Ռուսաստանը, շահագրգռված են Ղարաբաղյան հակամարտության լուծմամբ: Մենք քայլ առ քայլ գնում ենք այդ երկու երկրների մերձեցման գործում», – Բաքվում լրագրողների հետ զրույցում հայտարարել է ԱՊՀ-ի գործադիր քարտուղար Սերգեյ Լեբեդևը, հայտնում է ադրբեջանական Trend գործակալությունը:
«Վերջերս Աստրախանում Հայաստանի և Ադրբեջանի նախագահները ՌԴ նախագահի միջնորդությամբ պայմանավորվեցին զինվորականների մարմինների փոխանակման մասին, և դա գործնականում դարձավ դիրքորոշումների մերձեցման առաջին քայլերից մեկը»,- ասել է Լեբեդևը և հավելել. «Դրանք փոքր քայլեր են, բայց դրա հետ մեկտեղ` մենք քննարկում ենք օկուպացված տարածքների ազատման, Ադրբեջանի և Նախիջևանի, Ղարաբաղի և Հայաստանի միջև միջանցքի ստեղծման հարցը»:
ԱՊՀ-ի գործադիր քարտուղարի խոսքերով, Հայաստանը և Ադրբեջանը Ռուսաստանի համար եղբայրական երկրներ են: «Այդ երկրների մերձեցման համար մենք անում ենք հնարավոր ամեն ինչ, քանի որ ո’չ Հայաստանը, ո’չ Ադրբեջանը այլ տեղ չեն տեղափոխվելու: Դա Աստծո կողմից նրանց տրված հողն է, և նրանք դատապարտված են միասին ապրելու: Այդ իսկ պատճառով Ռուսաստանը` ե’ւ որպես ԵԱՀԿ-ի Մինսկի խմբի համանախագահ, ե’ւ որպես ԱՊՀ-ում նրանց գործընկեր, ե’ւ որպես հարևան երկիր, կգործադրի բոլոր ջանքերը նրանց մերձեցման համար»,- հայտարարել է Սերգեյ Լեբեդևը: Նա հայտնել է նաև, որ Բաքու կատարած իր այցի ընթացքում քննարկվել են այդ հարցերը: