ՀՀԿ 20-ամյակի հանդիսավոր նիստին Սերժ Սարգսյանը, խոսելով կոռուպցիան և կաշառակերությունը վերացնելու մասին, որպես օրինակ՝ մատնանշել էր հարևան Վրաստանը, ուր այդ խնդիրն արմատախիլ է արվել, և ժողովրդի մեջ վերականգնվել է հավատը իշխանությունների հանդեպ: Վրաստանի նախագահի խորհրդական Վան Բայբուրդին հարցրինք` Սաակաշվիլուն ինչպե՞ս է հաջողվել պայքարել այդ երևույթի դեմ, և ինչո՞ւ դա չի հաջողվում ՀՀ-ին:
«Հայաստանի մասին ինձ մի հարցրեք: Իսկ կոռուպցիայի վերացման, ոստիկանության, ուժային կառույցներում ռեֆորմներին Վրաստանի իշխանությունը գնաց` ունենալով իր հստակ ծրագիրը, գիտենալով, որ այդ բարեփոխումները կարող են համակարգի ներսում դժգոհությունների ալիք բարձրացնել: Այդ քայլին կարելի է գնալ` պատրաստ լինելով, որ բողոքողներ կլինեն, բայց դա անհրաժեշտ է երկրին, երկիրը հարկավոր է տանել բարեփոխումների, որպեսզի առաջին հերթին ոստիկանությունում, ուժային կառույցներում չլինի կաշառակերություն»,- ասաց նա:
Բայբուրդի խոսքերով, այդ բարեփոխումների արդյունքում ուժային կառույցների ավելի քան 25-30 հազար աշխատակից ազատվեց աշխատանքից, նրանցից ոմանք հիմա ընդդիմություն են դարձել, բայց Վրաստանի իշխանությունները չվախեցան այդ ամենից: Նա նաև նշեց, որ թեև այսօր ընդդիմությունը քննադատում է Վրաստանի նախագահին, բայց մյուս կողմից ողջունում է նրա քայլերը կոռուպցիայի վերացման և բարեփոխումներ անելու առումով: Վան Բայբուրդը հավաստիացրեց, որ այդ բարեփոխումներն այսօր էլ շարունակվում են, վերջերս էլ ձերբակալել են մարզպետերից մեկին ու նրա տեղակալին, այդ ամենը ցուցադրել հեռուստատեսությամբ, որպեսզի մյուսներն էլ իմանան` կոռուպցիայի դեպքում պատժվելու են: «Համակարգային փոփոխությունների գնալու համար կարևորը չվախենալն է»,- ասաց նա:
