Այսօր ՀՀ էկոնոմիկայի նախարար Տիգրան Դավթյանը ընդունեց Արաբական Միացյալ Էմիրությունների գործարար կանանց պատվիրակությանը:
«Հույս ունենք, որ Արաբական Էմիրությունների գործարար կանայք, մեր կանանց հետ միասին, լուրջ ավանդ կունենան մեր տնտեսության խնդիրները լուծելու հարցում»,- ողջունելով հյուրերին` ասաց Տիգրան Դավթյանը:
Նախարարը շեշտեց նաև, որ արաբ գործարարներին ընդունելը հենց այս ժամանակահատվածում շատ ողջունելի է, քանի որ ճգնաժամից հետո սկսված վերականգնողական աշխատանքները որոշակի հաջողություն են տվել տնտեսության զարգացման հարցում:
«Հայաստան գալուց առաջ մենք ուսումնասիրել ենք Հայաստանի տնտեսությունը և փորձել ենք հասկանալ` ինչ ոլորտներում կարող ենք համագործակցել ձեզ հետ: Կարծում ենք`հայ և արաբ գործարարները կարող են հարաբերություններ ծավալել արդյունաբերության, զբոսաշրջության, ադամանդագործության, տեղեկատվական տեխնոլոգիաների, գյուղատնտեսության ոլորտներում»,- ասաց արաբական պատվիրակության անդամ Շեյխա Հինդ ալ-Կասիմին:
Էկոնոմիկայի նախարարը կարծիք հայտնեց, որ համագործակցությունը այս բոլոր ոլորտներում արդյունավետ կլինի, քանի որ հաջողվել է դրա համար անհրաժեշտ բարիդրացիական մթնոլորտ ձևավորել վերջին տարիներին:
