Մեծ Բրիտանիայում գտնվող Թուրքիայի նախագահ Աբդուլահ Գյուլը հյուրընկալվել է BBC հեռուստաալիքով հեռարձակվող «Թեժ զրույց» ծրագրին: Քննարկման թեմաների շարքում են եղել Թուրքիայի եվրաանդամակցության եւ իրանական խնդրին առնչվող հարցերը: Ըստ թուրքական «CnnTurk» լրատվամիջոցի` Գյուլը նշել է, որ Անկարան դեմ է տարածաշրջանում որեւէ պետության` միջուկային զենք ունենալուն: Գյուլը նաեւ նշել է, որ Անկարան չի խրախուսում Թեհրանի դեմ կիրառվող պատժամիջոցները: Ըստ նրա` Իրանի հարցում Թուրքիայի հանդեպ անարդար են վարվում:
Թուրքիա-Եվրամիություն թեմային անդրադառնալով` Գյուլն առանց անուններ տալու քննադատել է որոշ ԵՄ առաջնորդների: «Լիարժեք անդամակցության համար Թուրքիան կանի այն ամենը, ինչ ստանձնել է: Դեռ չգիտեմ` մինչեւ 2025 թվականը Թուրքիան կդառնա՞ լիիրավ անդամ: Ո՞վ իմանա, գուցե հենց թուրք ժողովուրդը չկամենա լիիրավ անդամ դառնալ: Բայց ամեն դեպքում այս պահին ակնհայտ է, որ որոշ ԵՄ առաջնորդներ անարդարացիորեն Թուրքիայի դեմ խոչընդոտներ են ստեղծում», -ասել է Գյուլը: