Նախագահ Սերժ Սարգսյանը տիկնոջ՝ Ռիտա Սարգսյանի հետ հոկտեմբերի 30-ին աշխատանքային այցով մեկնել էր Վրաստան: Այցի շրջանակներում հանդիպումներ են տեղի ունեցել Վրաստանի նախագահ Գեորգի Մարգվելաշվիլիի, վարչապետ Իրակլի Ղարիբաշվիլիի, խորհրդարանի նախագահ Դավիթ Ուսուպաշվիլիի հետ: Հանդիպումների ընթացքում քննարկվել են հայ-վրացական հարաբերություններն ու բազմաբնույթ համագործակցության օրակարգն ու նախանշվել այն առաջ մղելու նոր հեռանկարները: Կարևորվել է Բագրատաշեն-Սադախլո սահմանային «Բարեկամության կամրջի» շինարարությունը, ինչպես նաև էներգետիկ համագործակցությանն առնչվող հարցեր:
Վրացագետ Ջոնի Մելիքյանի կարծիքով՝ նախագահի մակարդակով բանակցությունները անհրաժեշտություն էին՝ հաշվի առնելով նաև այն, որ անցած տարվա վերջից տնտեսական իրավիճակը ամբողջ տարածաշրջանում վատացավ, հայ-վրացական հարաբերությունները թեև կայուն են, բայց անհրաժեշտություն կա ավելի զարգացնելու:
Վրացագետը կարևորեց նաև էներգետիկ համագործակցության ընդլայնման հարցը: 2012 թ.-ից Վրաստանում խոսվում է էներգետիկ համակարգի անվտանգության ամրապնդման դիվերսիֆիկացման, Ադրբեջանի ազդեցության նվազեցման մասին:
Նախագահի պաշտոնական այցելությունից հետո մամուլում նաև շրջանառվեց, որ էներգետիկ համագործակցության ընդլայնման մասով հեռանկարները, ըստ երևույթին, նախանշվում են գազի ոլորտում: Մասնավորապես, «Արմենիա Նաուն» գրել էր, որ Վրաստանն աշխույժ բանակցություններ է վարում ռուսական «Գազպրոմից» մեծ ծավալով գազ գնելու շուրջ: Հիշեցնենք, որ ներկայումս Վրաստանը «Գազպրոմից» տարեկան ստանում է 3 մլրդ խորանարդ մետր ծավալով գազ, որից 2 միլիարդը տարանցվում է Հայաստան, մի մասը վերցվում է որպես տարանցման վճար, իսկ մյուս փոքր մասը՝ առևտրային օգտագործման նպատակով:
Սպառման համար իր գազի հիմնական մասը Վրաստանն ստանում է Ադրբեջանից:
«Արմենիա Նաուի» ներկայացմամբ ՝ Թբիլիսիում չեն հասկանում, թե Վրաստանի ինչին է պետք ռուսական գազը, եթե Ադրբեջանը կարող է ամբողջությամբ բավարարել գազի պահանջարկը: Սակայն, ամենայն հավանականությամբ, նախաձեռնությունը բխում է Ռուսաստանից, որը ցանկանում է Վրաստանի և Հայաստանի միջոցով գազ վաճառել Իրանում՝ չնայած նրան, որ Իրանն ունի աշխարհում գազի ամենախոշոր պաշարներից մեկը, բայց, ինչպես նշել է Ռուսաստանի էներգետիկայի նախարար Ալեքսանդր Նովակը, Ռուսաստանը և Իրանը պայմանավորվում են գազի փոխանակվող մատակարարման մասին: Այլ խոսքով՝ Իրանը Հայաստանի սահմանին գնում է ռուսական գազը իր հյուսիսային շրջանների համար և դրա հաշվին հարավում վաճառում իր գազը՝ որպես ռուսական: Ըստ «Արմենիա Նաուի»՝ այս կերպ Ռուսաստանը հույս ունի իր գազը հասցնել մինչև Պարսից ծոց:
Վրացագետ Ջոնի Մելիքյանի կարծիքով՝ շրջանառվող այս վարկածը իրատեսական և տրամաբանական չէ:
