Նոյեմբերի 1-ին Թուրքիայում կայանալու են արտահերթ խորհրդարանական ընտրություններ: Թեպետ հուլիսի 7-ին Թուրքիայում տեղի ունեցած հերթական խորհրդարանական ընտրություններում իշխող «Արդարություն և զարգացում» կուսակցությունը հաղթել էր, այնուամենայնիվ` խորհրդարանում նրա ստացած տեղերը բավարար չէին մեծամասնություն կազմելու և կառավարություն ձևավորելու համար: Համաձայն Թուրքիայի Սահմանադրության` անհրաժեշտ էր, որ խորհրդարան անցած ուժերը կազմեին կոալիցիա և ստեղծեին մեծամասնություն, ինչը, սակայն, չհաջողվեց:
Թուրքիայում լույս տեսնող «Ժամանակ» օրաթերթի գլխավոր խմբագիր Արա Գոչունյանը «Առաջին լրատվական»-ի հետ հեռախոսազրույցում ասաց, որ ամբողջ հասարակությունն այսօր Թուրքիայում սպասում է խորհրդարանական ընտրությունների արդյունքներին. «Անցումային շրջանում էին, անցումային շրջանի վերջավորությունը կորոշեն նոյեմբերի 2-ի առավոտյան»:
Ինչ վերաբերում է հունիսին անցկացված խորհրդարանական ընտրություններին, երբ խորհրդարանում ներկայացվածություն ունեցավ քրդական կուսակցությունն ու երեք հայ պատգամավոր, Արա Գոչունյանն ընդգծեց, որ ամենայն հավանականությամբ այդ երեք պատգամավորներն այս անգամ ևս ներկայացվածություն կունենան խորհրդարանում, բայց ասել, որ խորհրդարանում տեղ է գտել Հայոց ցեղասպանությունը ճանաչած կուսակցություն՝ սխալ կլինի. «Թուրքիայում գոյություն չունի որևէ կուսակցություն, որը ճանաչի Հայոց ցեղասպանությունը։ Ոչ մի կուսակցություն, առանց բացառության, Թուրքիայում գոյություն չունի, որ ճանաչել է Ցեղասպանությունը»:
Նույն օրը հերթական խորհրդարանական ընտրություններ են անցկացվելու նաև Ադրբեջանում: Եղած ընդդիմադիրներից «Մուսավաթ» կուսակցությունը բոյկոտել է ընտրություններին իրենց մասնակցությունը։ Ավելի վաղ կուսակցությունն Ադրբեջանի իշխանություններին առաջարկել էր 4 ամսով հետաձգել ընտրությունների անցկացումը՝ ազատելով բոլոր քաղբանտարկյալներին, ստեղծելով ժողովրդավարական պայմաններ ու հավասար հնարավորություններ քաղաքական բոլոր ուժերի ու թեկնածուների համար, սակայն որևէ բան չի արվել։
Արցախում հույս չունեն, թե այս ընտրությունները կարող են էական անդրադարձ ունենալ Ղարաբաղյան հակամարտության խաղաղ կարգավորման հարցում։ ԼՂՀ ԱԺ նախկին պատգամավոր Վահան Բադասյանը մեզ հետ հեռախոսազրույցում կարծիք հայտնեց, որ այս ընտրություններով պարզապես ամրապնդվելու է Ալիևի ռեժիմը։ Նախկին պատգամավորի կարծիքով՝ Ադրբեջանում չկա այնպիսի ուժ, որ համագործակցի Հայաստանի հետ հանուն խաղաղության, նույնիսկ այն կազմակերպությունների ներկայացուցիչները, որոնք այսօր ձերբակալված են՝ նման բռնապետությունում իրավիճակ փոխել չէին կարող։