Պարզվում է՝ ԴԱԻՇ-ի տնտեսական համակարգը բավական ամուր է, իսկ արտասահմանյան կոալիցիայի օդային հարվածները չկարողացան նրան լուրջ վնաս հասցնել: Այս մասին գրում է իսրայելական The Marker պարբերականը:
Ավելին՝ չնայած նավթային օբյեկտների ուղղությամբ օդային հարվածներին՝ խմբավորումն ամրապնդել է գրավված տարածքների վերահսկողությունը և պահպանել մեծ եկամուտները. ԴԱԻՇ-ը նախկինի պես նավթ է վաճառում 26 դոլարով գնորդներին Թուրքիայում, Իրաքում և Սիրիայում:
ԴԱԻՇ-ը նաև հարկահանության սեփական համակարգ է ստեղծել: Ձեռնարկությունների եկամուտներից խմբավորումը վերցնում է 2,5 %-ը, իսկ բեռնատար ավտոմեքենաների փոխադրման տուրքը հասնում է 400 դոլարի մեկ բեռնատարից կամ բեռի արժեքի 10 %-ը:
Բացի դրանից՝ ԴԱԻՇ-ը հարկ է վերցնում իրաքցի և սիրիացի պետական ծառայողների աշխատավարձից, որոնք հայտնվել են խմբավորման վերահսկողության տակ գտնվող տարածքներում: Իրաքի իշխանություններն այդպիսի պաշտոնյաներին մոտ 3,5 մլրդ դոլար են վճարում ամսական, իսկ ԴԱԻՇ-ի հարկը կարող է հասնել այդ գումարի 50 %-ին:
Խմբավորումը նաև վերահսկում է հատիկավորների հիմնական պահեստները և գնում է տեղի գյուղատնտեսական ապրանք արտադրողների արտադրանքը: Արդյունքում՝ իր տարածքում ԴԱԻՇ-ը մնում է սննդամթերքի գլխավոր մատակարարը:
