«Փերինչեքն ընդդեմ Շվեյցարիայի» դատական գործընթացում ՄԻԵԴ-ի որոշումը պետք է դիտարկել ոչ թե որպես հաղթանակ, այլ պահանջների բավարարում: Այսօր կազմակերպված քննարկման ընթացքում հայտարարեց արդարադատության նախարարի տեղակալ Արման Թաթոյանը: Նրա դիտարկմամբ՝ դատական գործընթացում որպես երրորդ կողմ ներգրավված Հայաստանի համար սա ևս կարելի է ձեռքբերում համարել:
Միջազգային իրավունքի մասնագետ Արա Ղազարյանի դիտարկմամբ դատավարության ընթացքում պետք է հաշվի առնվեին Փերինչեքի ամբողջ գործունեությունն ու անցյալում հնչեցրած ելույթները: Մասնագետը վստահ է, որ այդ տարբերակում Եվրադատարանը նրա հայտարարությունները կորակեր ոչ թե չեզոք, այլ ռասիստական: Եթե այդպես լիներ, ապա ազատ խոսքի ազատության իրավունքը չէր տարածվի նրա վրա:
Իրավապաշտպան Ավետիք Իշխանյանը, անդրադառնալով դատարանի որոշմանը, նշեց. «Չնայած որոշ ձևակերպումներ փոփոխվեցին, բայց մեծ հաշվով Փերինչեքը հաղթեց այս դատը»:
Իշխանյանի դիտարկմամբ՝ դատավարության ընթացքի ու որոշման վրա մեծ է եղել այն փաստի ազդեցությունը, որ այսօր Թուրքիան շատ կարևոր գործընկեր է Եվրոպայի համար:
Ուստի, այս համատեքստում որոշումը Հայաստանի համար դիտարկելը որպես հաղթնակ՝ միանշանակ սխալ է:
