«Առաջին լրատվական»-ի զրուցակիցն է ՀՀ ժողովրդական արտիստ, դաշնակահարուհի Սվետլանա Նավասարդյանը:
– Տիկին Նավասարդյան, դասական երաժշտությունը համաշխարհային մակարդակով վերջին տարիներին կարծես ճգնաժամ է ապրում…
– Ուզում եմ ընդհատել. դասական երաժշտության հետ ամեն բան կարգին է: Երբեք չի եղել և չի լինի ժամանակ, որ այն ճգնաժամ ապրի: Անհնարին է: Այն միշտ կունենա ունկնդիր, միշտ պահանջված կլինի, քանի որ մարդն անպայման իրեն կվերագտնի դասական երաժշտության մեջ: Հայաստանում այս առումով շատ լավ վիճակ է:
– Սակայն մեզանում շատերը փորձում են դրսում ռեալիզացվել, կա արտագաղթ նաև այդ ոլորտում:
– Ամեն ոլորտ գոյության իրավունք ունի: Ամեն ժանր, ամեն բնագավառ ունի իր ունկնդիրը: Ինչ վերաբերում է դասական երաժշտությանը, կարևորն այն է, որ այն ճիշտ մատուցվի, մաքուր պահվի, և ինքը՝ մաքուրը, ինքնըստինքյան մաքրում է շուրջը:
– Հանրության մեջ, սակայն, երբեք դասական երաժշտությունը լայն համակիրների շրջանակ չի ունենում:
– Դա ամենուր է: Դրսում շատ են սիրում տան պայմաններում գործիքներ ունենալ, չորս ձեռքով նվագել և այլն, այս ամենը մեզանում չկա, քանի որ նման ավանդույթ չունենք: Բայց այսօր մենք ունկնդրի պակաս չունենք, հակառակը՝ քանի գնում ընդլայնվում է, շնորհիվ նաև կազմակերպվող փառատոների:
– Պատկան մարմինները որքանո՞վ են գնահատում, հովանավորում:
– Կարծում եմ՝ այնչափ, որչափ հնարավոր են գտնում, դժգոհելու առիթ չկա:
– Վերջին շրջանում քննադատվեց նաև կոչումների ինստիտուտը, առհասարակ դրա նպատակահարմարությունը: Ի՞նչ եք կարծում՝ արդյոք այն չպե՞տք է վերացնել:
– Չեմ կարծում, որ պետք է վերացնել, բայց կարծում եմ՝ պետք է խստացնել մի փոքր: Հավանաբար պետք է մտածել, մշակել համապատասխան ձևեր, պետք է տարբեր ոլորտներին համապատասխան մշակել:
– Դուք ակտիվ ստեղծագործական կյանքով եք ապրում, մինչդեռ քաղաքացիական կամ քաղաքական դիրքորոշում արտահայտելիս Ձեզ չենք տեսնում, ինչո՞ւ:
– Կներեք, դա իմը չէ, մարդը չպետք է անի այն, ինչն իրենը չէ: Ես անում եմ այն, ինչ կարող եմ անել: Ես հեռու եմ դրանից: Գուցե վերամբարձ է հնչում, բայց ես ի վերջո գործ ունեմ հավերժական նյութի հետ:
– Ժամանակակից ստեղծագործողները կարծես քիչ են:
– Չեմ կարծում՝ քիչ են, շատ շատ են, պարզապես մենք չենք ճանաչում: Փառատոները հնարավորություն են տալիս ճանաչելու նրանց:
