Քաղաքագետ Իգոր Մուրադյանը «Առաջին լրատվական»-ի հետ զրույցում անդրադառնալով Իրանի փոխնախագահի՝ Հայաստան կատարած այցին՝ նկատեց, որ այդ այցը բացարձակապես տնտեսական չէ:
Նրա խոսքով՝ այս այցի նպատակն է պարզել, թե որքանով է Հայաստանը ինքնիշխան պետություն և ունակ՝ լինելու Իրանի գործընկերը. «Եթե պարզվի, որ Հայաստանը կախվածության մեջ է մնում Ռուսաստանից, իհարկե՝ Իրանը կընտրի Թուրքիան՝ որպես գազի տարանցման երկիր: Իսկ Ռուսաստանը այս 20 տարիների ընթացքում արեց ամեն ինչ, որպեսզի Հայաստանը չունենա ռազմավարական հարաբերություններ ոչ Իրանի, ոչ Թուրքիայի հետ»:
Սակայն մեր զրուցակցի խոսքով՝ հիմնական հարցն այն է, որ հայ հասարակությունը, հայկական աշխարհայացքը դեգրադացվել է, իսկ պետությունն էլ վաղուց դադարել է այդպիսին լինելուց. «Հայաստանը վասալային կախվածության մեջ է Ռուսաստանից, իսկ Իրանը շատ լավ գիտի, թե այստեղ ինչ է կատարվում»:
Ուստի Իգոր Մուրադյանը կարծում է, որ Հայաստանը Իրանի հետ չունի ոչ տնտեսական, ոչ քաղաքական հեռանկարներ: