Վրացական georgiatimes.info կայքի փոխանցմամբ, վրաց պատգամավոր Նուգզար Ցիկլաուրին GHN գործակալությանը տված հարցազրույցի ժամանակ սպառնացել է Աբխազիայի և Ցխինվալի հետ ավիահաղորդակցության մեջ մտնել պատրաստվողներին.
«Մենք չենք կարծում, թե որևէ հայտնի և լուրջ ավիաընկերություն կսկսի ավիաթռիչքներ իրականացնել դեպի Աբխազիա: Բայց եթե նմանատիպ բան տեղի ունենա, ապա Իսրայելը կամ ցանկացած ուրիշ երկիր պետք է քաջ գիտակցեն, որ այդ դեպքում նրանք, հանձինս Վրաստանի, ձեռք կբերեն ուժեղ հակառակորդի:
Այստեղ երկու կարծիք լինել չի կարող: Սա երկրի հեղինակության խնդիրն է: Բոլոր ընկերությունները պետք է իմանան, որ դեպի Աբխազիա և Ցխինվալ թռիչքների գործելու դեպքում ICAO-ն (Միջազգային քաղաքացիական ավիացիոն կազմակերպություն) լրջորեն կպատժի նրանց»:
Հիշեցնենք, որ ներկայումս աբխազական իշխանություններն արդիականացման աշխատանքներ են իրականացնում Սուխումի օդանավակայանում: Միջազգային վկայական ստանալուց հետո օդանավակայանն իր գործունեությունը կարող է սկսել արդեն 2012 թվականի ամռանը:
Ի դեպ, օրեր առաջ Աբխազիայի վարչապետի օգնական և խորհրդական Բեսլան Էշբան հայտարարեց, որ աբխազական իշխանությունները մտադիր են ուղիղ ավիահաղորդակցության հաստատման հարցով դիմել Իսրայելին.
«Թուրքիայից և Ռուսաստանից բացի, մեզ համար առաջնահերթ է համարվում Իսրայելի հետ ուղիղ ավիահաղորդակցություն ունենալը: Մենք նախնականորեն այդ հարցը քննարկել ենք այստեղ ժամանած մեր իսրայելցի գործընկերների հետ»:
