Ֆրանսիայի պետբյուջեի նախկին նախարար Ժերոմ Կայուզակը փորձել է հաշիվ բացել շվեյցարական բանկերից մեկում և այնտեղ պահել 15 մլն եվրո: Այս մասին հայտնում է Radio France internationale-ը:
2009 թվականին Կայուզակը դիմել է Reyl et Co. մասնավոր բանկ՝ այնտեղ հաշիվ բացելու առաջարկով, սակայն այդ վարկային հաստատությունում նրան մերժել են, քանի որ այդ ժամանակ Կայուզակը հայտնի քաղաքական գործիչ էր:
Նույն թվականին Շվեյցարիայի իշխանությունները հայտարարել են, որ «հարկային փախստականների» որոնման հարցում պատրաստ են իրավաբանական աջակցություն ցուցաբերել այլ պետություններին, այդ իսկ պատճառով Ժերոմ Կայուզակը մտածել է, որ վտանգավոր է շվեյցարական բանկերում գումար պահելը:
Իր եկամուտները թաքցնելու համար նա դիմել է նույն Reyl et Co բանկին, որը 1993 թվականին կառավարում էր իր ֆինանսները, և խնդրել գումարը Սինգապուր՝ Julius Baer բանկի մասնաճյուղ տեղափոխել:
Ներկայում ֆրանսիական քննության տրամադրության տակ է 600 հազար եվրոյի մասին տեղեկությունը, որը Կայուզակը յուրացրել է հարկերից խուսափելու միջոցով: Եթե 15 մլն եվրոյի տեղեկությունը հաստատվի, կնշանակի, որ նախկինում Կայուզակը իր գումարները փոխադրել է Շվեյցարիայի այլ բանկերի միջոցով:
