ՀՀ Մարդու իրավունքների պաշտպան Արմեն Հարությունյանի նախաձեռնությամբ մշակվել է «Հավաքների մասին» օրենքի նախագիծ, որն անցել է Վենետիկի հանձնաժողովի փորձաքննությունը: Հարությունյանի խոսքերով, օրենսդրական նախաձեռնությամբ հանդես գալու հիմնական պատճառն այն է եղել, որ այս տարվա մայիսին «Հավաքների մասին» արտահերթ զեկույցը պատրաստելիս արձանագրված մի շարք խախտումները իրավակիրառ պրակտիկայի եւ օրենսդրական տեսանկյունից: Մասնավորապես, ըստ Արմեն Հարությունյանի, խախտվում են հավաքների անցկացման հիմնական բաղադրիչները` հոգուտ հավաքների անցկացման կանխավարկածը, խաղաղ հավաքների պաշտպանության պետության պարտականության իրականացումը, վարչարարությունը, խտրականության բացառումը, օրինականությունը:
«Ես համոզված եմ, որ որքան օրենսդրական մակարդակով կատարյալ նախագիծ ունենանք, այնքանով ավելի նվազ խնդիրներ կունենանք իրավակիրառ պրակտիկայում: Իհարկե, դժվար է պնդել, որ եթե օրենսդրությունը կատարյալ է, ապա դրա կիրառման պրակտիկայում խնդիրներ չեն առաջանա, բայց այնուամենայնիվ դրանք փոխկապակցված են»,- ընդգծեց Մարդու իրավունքների պաշտպանը:
Արմեն Հարությունյանը նշեց, որ գործող օրենքով չնչին իրավախախտումը կարող է հիմք հանդիսանալ, որպեսզի դադարեցվեն հավաքները, իսկ իրենց ներկայացրած նախագծում դա այլեւս հնարավոր չի լինի. «Հիմնվելով միջազգային փորձագետների մոտեցումների վրա՝ մեխանիզմներ ենք նախատեսել, որտեղ շատ հստակ նշվում է, որ կարելի է դադարեցնել ծայրահեղ դեպքում, եթե այլ կերպ հնարավոր չէ պաշտպանել այլ անձանց հիմնարար իրավունքները: Մտցրել ենք նաեւ բանակցությունների ինստիտուտ, քանի որ կարող ես հայտ ներկայացնել, բայց վարչական մարմինները պարզապես չպատասխանեն եւ չիմանաս, այլեւս ինչ անել: Մեր օրենքը իրավական հետեւանքներ է թողնում եւ հնարավորություն է ընձեռում հայտին չպատասխանելու դեպքում հանրահավաք անել»:
ՄԻՊ ներկայացրած նախագծի համաձայն՝ եթե անգամ հավաքը չարտոնված է, սակայն այն խաղաղ է անցնում, ապա ոստիկանությունը ոչ թե պետք է ցրի այն, այլ պետք է աջակցի դրա անցկացմանը: Գործող օրենքով հավաքի անցկացման մերժումը իրականացվում է շատ ընդհանուր ձեւակրեպումներով: Արմեն Հարությունյանը շեշտեց, որ ներկայացվող նախագծով մերժման պահանջները շատ կոնկրետ են եւ ընդհանուր դրույթներով արգելել այլեւս անհնարին է: Հարությունյանը նաեւ նկատեց, որ իրենք հաշվի են առել ԵԱՀԿ/ԺՀՄԻԳ-ի զեկույցը հավաքների մասին, որտեղ շեշտվում է, որ հավաքի արգելումը պետք է կիրառվի որպես ծայրահեղ միջոց:
«Օրենքի նախագծում կան դրույթներ, որոնք բավականին հեղափոխական են եւ ոչ թե մեկ, այլ երկու քայլ առաջ է գործող օրենքից»,- նշեց ՄԻՊ Արմեն Հորությունյանը:
