«Անի Պլազա» հյուրանոցում մեկնարկել է «Սահմանադրական Բարեփոխումները Հայաստանում» թեմայով քննարկում, որտեղ «Համաձայնություն» քաղաքական հետազոտական կենտրոնի ղեկավար Դավիթ Շահնազարյանը մասնավորապես նշեց. «Երբեք չեմ թաքցրել, որ կողմ եմ պառլամենտական կառավարման համակարգին: Գործող Սահմանադրությունը բացառում է ընդհանրապես Հայաստանում որևէ էվոլյուցիոն զարգացում, թեկուզ այն իմաստով, որ իշխանափոխության հնարավորություն չի տալիս:
Շատ կարևոր է, որ Սահմանադրական փոփոխություններով փակվում է նախորդ նախագահների իշխանության գալու ճանապարհը:
Դրական փոփոխություն է նաև այն, որ ամբողջ իշխանությունն այսօր մեկ անձի՝ նախագահի ձեռքում է, ըստ նոր նախագծի՝ իշխանությունը բաժանվում է 2 անձերի միջև՝ նախագահի և վարչապետի կամ, ըստ այլ կարծիքների, նախագահի և ԱԺ նախագահի միջև:
Բացասական է 89-րդ հոդվածը, այստեղ պետք է նշվեր, թե ինչ է նշանակում կայուն մեծամասնություն:
Կա առավել մտահոգիչ պահ. ներկայացված նախագծը չի երաշխավորում Հայաստանի հանրապետության տարածքային ամբողջականությունը: Թե «այո»-ի, թե «ոչ»-ի կողմնակիցները այս հարցը չբարձացրին: Ստացվում է, որ իշխանությունն ավելի կարևոր հարց է, քան թե պետականությո՞ւնը, սա լրջագույն վտանգ է: Ներքաղաքական այս զարգացումներում կարծես թե արհամարհվում է, թե ինչ է կատարվում մեր շուրջ: Դեկտեմբերի 6-ին մենք ունենալու ենք լրիվ այլ իրավիճակ, և արդեն հասարակության լայն շերտերի համար պարզ են դառնալու որակապես նոր սպառնալիքները, որոնք արդեն իսկ կախված են մեր պետության վրա»:
Մանրամասները՝ տեսանյութում: