Երեկ Իրաքի հարավային շիական երեք քաղաքներում իրականացված պայթյունների հետևանքով 21 մարդ է զոհվել: Ինչպես հայտնում է Associated Press-ը, սա ակնհայտորեն փորձ է` խաթարելու նոր կառավարություն ձևավորելու փորձերը, որոնք մոտ են հաջողությանը` ութ ամիս շարունակ առաջընթացի բացակայությունից հետո:
Ավտոմեքենաներում տեղադրված ռումբերի պայթեցումները Քերբելա և Նաջաֆ սուրբ քաղաքներում և Իրաքի երկրորդ` Բասրա քաղաքում արդեն երրորդ նմանատիպ հարձակումներն են անցյալ շաբաթ սկիզբ առած բռնությունների շարքում: Դրանցից առաջինը Բաղդադի եկեղեցում 50 քրիստոնյաների սպանդն էր, երկրորդը` համակարգված պայթյունները Բաղդադում, որոնք խլեցին 90 մարդու կյանք:
Դեռևս ոչ ոք պատասխանատվություն չի ստանձնել երկուշաբթի տեղի ունեցած ահաբեկչական գործողության համար, սակայն բռնությունները ընդգծում են Ալ-Ղաիդայի և մյուս սուննի ծայրահեղականների ձգտումը` բորբոքելու միջկրոնական հակասությունները հենց այն ժամանակ, երբ երկրի հիմնական համայնքների ղեկավարները փորձում են համաձայնության գալ նոր կառավարության ձևավորման շուրջ: