Chathom Haouse-ի պարգեւը ստանալու համար Լոնդոն մեկնած Թուրքիայի նախագահ Աբդուլլահ Գյուլը դասախոսությամբ է հանդես եկել Օքսֆորդի համալսարանի իսլամագիտության կենտրոնում: Դասախոսության թեման եղել է «Իսլամական աշխարհը, ժողովրդավարությունը եւ զարգացումը»: Այս մասին տեղեկացնող թուրքական «Sabah»-ը հայտնում է նաեւ, որ Գյուլն այնուհետեւ պատասխանել է ներկա գտնված գիտնականների եւ ուսանողների հարցերին: Այն հարցին, թե երբ է բացվելու հայ-թուրքական ցամաքային սահմանը, եւ Հայաստան-Թուրքիա հարաբերությունները երբ են կարգավորվելու, նախագահ Գյուլը պատասխանել է, որ այդ ուղղությամբ Անկարան բավականին ջանքեր է թափել:
«Տարածաշրջանային սառեցված խնդիրները հարկ է չթողնել, որ խրոնիկական դառնան: Այլապես միանգամից կպայթեն»,- ասել է Գյուլը` որպես օրինակ մատնանշելով Վրաստանի հետ կատարվածը: Հերթական անգամ ընդգծելով, որ կովկասյան տարածաշրջանի այսօրվա իրադրությունը ոչ մեկի շահերից չի բխում, Թուրքիայի նախագահը նշել է, որ առկա հարցերը երկխոսության ճանապարհով լուծելու կարիք կա: Գյուլն ուշադրություն է հրավիրել այն հանգամանքի վրա, որ Հայաստանի անկախացման հենց առաջին օրը Թուրքիան ճանաչեց այն, բայց, այնուամենայնիվ, երկու երկրների միջև որոշ խնդիրներ ծագեցին: «Հարկավոր է աշխատել Կովկասի խաղաղության համար: Մենք հենց դա էլ անում ենք»,- ասել է Թուրքիայի նախագահը` նշելով, որ այդ աշխատանքները երբեմն հուսադրող են լինում, երբեմն էլ անձայն դիվանագիտութուն է բանեցվում:
