Ռուսաստանյան ԶԼՄ-ների փոխանցմամբ, Պետդումայում Լիբերալ-դեմոկրատական կուսակցության պատգամավոր Աշոտ Եղիազարյանի գրասենյակում եւ ընդունարանում խուզարկություն է կատարվել: Այն իրականացվել է պատգամավորի վերաբերյալ խարդախության մասին քրեական գործը վարող հետաքննիչների կողմից: Եղիազարյանի շահերը ներկայացնող փաստաբան Դմիտրի Բարաննիկովի խոսքով, խուզարկությունն իրականացվել է «Դաեւ Պլազա» բիզնես-կենտրոնում եւ ավելի քան հինգ ժամ է տեւել: Հետախուզական միջոցառումների արդյունքների մասին չի հաղորդվում, տեղեկացնում է Lenta.ru-ն: Եղիազարյանին նոյեմբերի 3-ին զրկեցին անձեռնմխելիությունից: Պատգամավորն ընտանիքի հետ գտնվում է Մեծ Բրիտանիայում եւ հրաժարվում է Ռուսաստան վերադառնալուց` չնայած Գլխավոր դատախազության ներկայացուցիչների հավաստիացումներին այն մասին, որ իրեն ձերբակալություն չի սպառնում:
Հետաքննության վարկածի համաձայն` Եղիազարյանը Ռոսիմուշչեստվոյի նախկին ղեկավարի տեղակալ Միխայիլ Անանեւից կես միլիարդ ռուբլի էր պարտքով վերցրել` խոստանալով ներդրումները վերադարձնել Ռուբլյովյան մայրուղու վրա գտնվող «Եվրոպարկ» բիզնես-կենտրոնի և վերակառուցված «Մոսկվա» հյուրանոցի մասնաբաժիններով: Սակայն տուժածը կատարված ներդրումների փոխարեն չէր ստացել ո’չ գումարը, ո’չ էլ այլ ակտիվներ: Եղիազարյանի գործողություններից տուժած երկրորդ անձը, հետաքննության տվյալներով, ձեռնարկատեր Վիտալի Սմագինն է: Նա հայտարարել է, որ պատգամավորն իրենից «Եվրոպարկի» 20-տոկոսանոց մասնաբաժին է հափշտակել, որը գնահատվում է մեկուկես միլիարդ ռուբլի: