Ողջույն, ես Ֆրենկ Տուն եմ, Հայաստանում ԱՄՆ հյուպատոսը: Ամեն ամիս ես պատասխանում եմ ԱՄՆ մուտքի վիզաների ու ներգաղթային գործընթացների վերաբերյալ ձեզ հետաքրքրող հարցերին: Շնորհակալ եմ ձեր ուղարկած բազմաթիվ հարցերի համար: Խնդրում եմ հարցն ուղարկելիս ներառել նաև ձեր էլեկտրոնային փոստի հասցեն, որպեսզի այս թողարկումներում ձեր հարցին անդրադառնալու հնարավորություն չունենալու դեպքում, իմ գրասենյակը ուղղակիորեն պատասխանի ձեզ:
Այսօր ես ուզում եմ խոսել Միացյալ Նահանգներում ապաստան հայցելու մասին: Ապաստանը շատ նուրբ հարց է: Չնայած դեսպանատունն ու իմ գրասենյակը ապաստանի հարցերով չեն զբաղվում, սակայն մենք ստանում ենք ԱՄՆ-ում ապաստան հայցողների մասին հաշվետվություններ, որոնք փաստում են, որ ԱՄՆ-ում կան ապաստան հայցող ՀՀ քաղաքացիներ: Այս հաշվետվությունները հրապարակավ հասանելի են համացանցում՝ ԱՄՆ քաղաքացիության ու ներգաղթի ծառայության կայքում, որն զբաղվում է այս հայցերի քննությամբ:
Հարց. Տուրիստական/բիզնես վիզայով ԱՄՆ տարածքում գտնվելիս կարո՞ղ եմ ապաստան հայցել:
Տեխնիկապես, ԱՄՆ տարածքում ապաստան հնարավոր է հայցել ցանկացած տեսակի վիզայով կամ անգամ վիզա չունենալու դեպքում: Ապաստան հայցելը դեռ չի նշանակում, որ ապաստանը տրամադրվում է: Կա ապաստանի համար դիմելու գործընթաց, իսկ վերջին տարիներին ՀՀ քաղաքացի ապաստան հայցողների ապաստանի դիմումները մերժվել են և որոշվել է, որ նրանք պետք է հեռանան Միացյալ Նահանգերի տարածքից:
Իմ գրասենյակը նաև շատ հարցեր է ստանում այն մասին, թե արդյոք դեսպանատունը կարող է ապաստան տրամադրել: Ոչ, ԱՄՆ կառավարության ոչ մի օղակ արտերկրում ապաստանի կարգավիճակ շնորհելու իրավասություն չունի: Ապաստան կարող է տրամադրվել միայն այն անձանց, ովքեր ֆիզիկապես գտնվում են ԱՄՆ տարածքում:
Հարց. Որո՞նք են ապաստանի հայցը մերժելու հետևանքները:
Ապաստանի հայցի մերժման դեպքում կան լուրջ հետևանքներ: Նախ, ամենամեղմ դեպքում, ապաստան հայցողին հրաման է տրվում հեռանալ Միացյալ Նահանգներից: Որոշ դեպքերում ապաստան հայցողը կարող է մինչ մեկնելը կալանքի տակ պահվել ներգաղթային պահման վայրերում: Երկրորդ, եթե ամերիկյան պատկան մարմինները եզրակացնում են, որ առկա է միտումնավոր կերպով սխալ տեղեկությունների տրամադրում ապաստանի մասին հայցում, ապա սա կարող է հանգեցնել նրան, որ հետագայում տվյալ անձը երբէև որևէ ներգաղթային արտոնությունից օգտվելու հնարավորություն չունենա: Եվ վերջում, անկախ սխալ տեղեկություններ ներկայացնել-չներկայացնելու փաստից, ապաստանի տրամադրումը մերժելու մասին համապատասխան հիշատակումը կպահպանվի մեր ներգաղթային տեղեկատվական համակարգերում, որի տվյալները մշտապես դիտարկվում են մեր հյուպատոսական պաշտոնյաների կողմից ամեն անգամ, երբ տվյալ անձը վիզայի դիմում է ներկայացնում: Հիշեք, տուրիստական, բիզնես կամ ուսանողական վիզա ստանալու համար դիմողը պետք է կարողանա հիմնավորել ու փաստարկել, որ ԱՄՆ-ում մնալու մտադրություն չունի:
Հարց. Քույրս դիմել ու ապաստան է ստացել Միացյալ Նահանգներում: Այժմ ես ուզում եմ նրան այցելության գնալ: Ապաստանի նրա հայցը կարո՞ղ է բացասաբար անդրադառնալ իմ տուրիստական/բիզնես վիզայի դիմումի վրա:
Շնորհակալություն, սա ևս մի հարց է, որ մեզ հաճախ են տալիս: Երբ դուք վիզայի դիմում եք ներկայացնում հյուպատոսական պաշտոնյան դիտարկում է ձեր դիմումն ու ձեզ հետ կապ ունեցող անձանց ներգաղթային պատմությունը: Հյուպատոսական պաշտոնյան ուսումնասիրում է, թե ինչպես են վիզայի համար դիմած անձի հարազատները՝ ընտանիքի անդամներ, ընկերներ ներգաղթել Միացյալ Նահանգներ: Ամերիկյան օրենսդրության համաձայն հյուպատոսական պաշտոնյան ցանկացած անձի պարտավոր է դիտարկել որպես հնարավոր ներգաղթող՝ անկախ ԱՄՆ-ում հարազատներ ունենալ-չունենալու հանգամանքից: Եթե դիմողն ունի հարազատներ՝ ընտանիքի անդամ կամ ընկեր, որ ապաստան է հայցել ԱՄՆ-ում, ապա հյուպատոսական պաշտոնյան պետք է դիտարկի դիմողի ընթացիկ սոցիալական, տնտեսական իրավիճակը, ազգակցական կապերը Հայաստանում՝ հասկանալու, արդյոք նա չի ուզենա հետևել ապաստան հայցած հարազատի օրինակին:
Շարունակեք գրել մեզ և մենք սիրով կանդրադառնանք ձեր հարցերին մեր հաջորդ թողարկումներում:
