Ինչպես հաղորդում են համաշխարհային լրատվամիջոցները, երեկ Սիրիայի տարածքում տեղի ունեցած բողոքի ակցիաների ժամանակ զոհվել է մոտ 90 մարդ: BBC-ն հաղորդում է 88 զոհի մասին` նշելով, որ չնայած ուրբաթ օրը օրենք էր ստորագրվել արտակարգ դրության ռեժիմի վերացման մասին, սակայն շաբաթ օրն առավոտյան գրեթե բոլոր մեծ քաղաքներում հայտնվել էր ծանր զինտեխնիկա:
Ամենաշատ զոհերը կրկին գրանցվել են հարավային Դարաա քաղաքում, որտեղից են մարտի 18-ին սկսվել բողոքի ակցիաները: Իրավապաշտպան Sawasiah կազմակերպությունը հայտնել է, որ հիմնական սպանությունները տեղի են ունեցել Դամասկոսի մերձակա Զամալեք քաղաքում, ինչպես նաև Հոմսում, Համայում, Լաթակիայում և այլուր:
Սիրիայում տեղի ունեցող բռնությունները դատապարտել են ԱՄՆ-ն և ՄԱԿ-ի գլխավոր քարտուղարը:
ԱՄՆ նախագահ Բարաք Օբաման Սիրիայի իշխանություններին մեղադրել է նույնիսկ Իրանից օգնություն ստանալու և բողոքի ակցիաները ճնշելու մեջ: «Սեփական ժողովրդին լսելու փոխարեն, նախագահ Ալ-Ասադը մեղադրում է օտարերկրյա ուժերին, մինչդեռ ինքը օգնություն է խնդրում Իրանից` բռնություններ կիրառելով սեփական ժողովրդի դեմ», ասվում է Օբամայի հայտարարության մեջ:
Մոսկվայում գտնվող ՄԱԿ-ի գլխավոր քարտուղարը նույնպես կոչ է արել դադարեցնել բռնությունները սեփական ժողովրդի դեմ:
