Մի տեսակ աբսուրդային բան է ստացվում. «Ժամանակ»-ն ասում է` մենք չենք կասկածում, որ Սերժ Սարգսյանը «Գլենդել Հիլզ»-ի արած անորակ գործը տեսնելով ճիշտ գնահատական է տվել, այն է` իրավասու կառույցները պետք է համապատասխան եզրակացություն անեն: Այդ մասին գրել ենք, և մեզնից ընկերությունը փոխհատուցում է ուզում` իր բարի համբավն արատավորելու համար:
Իսկ այսօր նախնական դատական նիստում հայցվոր կողմը դատարան ներկայացրեց նյութեր, որոնցով փորձելու է ապացուցել իր «բարի համբավը». դրանք, հայցվորի բնորոշմամբ` թերթերում տպագրված դրական արձագանքներ են շինարարական «Գլենդել Հիլզ» ընկերության մասին: Խոսքը «Առավոտ»-ի` «Մարդիկ գոհ են Գլենդել Հիլզից», «Հրապարակ»-ի` «Մուշի բնակիչներն այս անգամ գոհ են», նախագահական Panorama.am կայքում տպագրված նյութեր են, որոնք դեռ հետազոտման կարիք ունեն:
Բայց «Հրապարակ»-ի վերնագրից արդեն կարելի է կռահել, որ այդ ընկերությունից նախկինում գոնե մեկ անգամ դժգոհ եղել են: Ուշագրավ է նաև այն, որ Panorama.am-ն է կասկածի տակ դրել շեֆի` Սերժ Սարգսյանի գնահատականը:
Ի դեպ, «Սկիզբ Մեդիա Կենտրոն» ընկերության ներկայացուցիչը հարցում է ուղարկել ՀՀ գլխավոր դատախազություն` տեղեկանալու, ինքնափլուզման (ինչի մասին գրել էր «Ժամանակ»-ը) կամ «գաջի թափման» փաստով որևէ գործ հարուցվե՞լ է, թե՞ ոչ…