Ապրիլի 20-ին, Սերժ Սարգսյանի հրավիրած խորհրդակցությունը իրավապահ համակարգի ներկայացուցիչների հետ, որի ժամանակ նա հանձնարարել է նոր թափ հաղորդել Մարտի 1-ի գործերի քննությանը, ըստ ՆԺԿ առաջնորդ Արամ Կարապետյանի պայմանավորված է դրսի ուժերի ազդեցությամբ: Կարապետյանը նշեց, որ ինքը համաձայն չէ այն դիտարկումների հետ, թե այս կերպ Սարգսյանը կատարում է ընդդիմության պահանջը, կամ էլ անձնական հարցեր է լուծում Ռոբերտ Քոչարյանի հետ. «Փորձը ցույց է տալիս, որ Հայաստանում ոչ ընդդիմության պահանջները կամ առաջարկներ են կատարվում, անձնական խնդիրներն էլ լուծվում են անձնական սեփականության նկատմամբ նկրտումներով»:
Ըստ Կարապետյանի, Սերժ Սարգսյանի քայլը պայմանավորված է երկու հանգամանքով. «Չմոռանանք, որ համազեկուցողները բավականաչափ խիստ ընդգծել էին, որ Մարտի մեկը թունավորում է հայկական քաղաքական դաշտը, և երկրորդ` մոտենում են ընտրությունները: Պարզ է, որ Մարտի մեկը դառնալու է ընդդիմության գլխավոր և ճիշտ խաղաքարտերից մեկը»:
Ավելին, ըստ Կարապետյանի, դեռևս բրեժնևյան ժամանակաշրջանում, եթե ինչ-որ հարց չէին ուզում լուծել, կամ հանձնաժողով էին ստեղծում, կամ էլ խորհրդակցություններ էին անցկացնում, նույնն էլ այժմ անում է Սերժ Սարգսյանը:
«Եթե մարդիկ երեք տարվա մեջ ոչինչ չեն բացահայտել, ապա այդ նույն մարդիկ ինչպես են նոր բան բացահայտելու: Ինձ թվում է, որ Սերժ Սարգսյանի և այդ խորհրդակցությանը նստած մարդկանց համար է, որ Մարտի մեկը բացահայտված չէ, մնացածների համար Մարտի մեկը բացահայտված է, այլ հարց է, որ իրավական ուժ չի ստացել:
Այս ամենը շատ կարևոր հարցի շուրջ վատ կազմակերպված PR է»,- մանրամասնեց Արամ Կարապետյանը:
