Եգիպտոսի դատարանը ապրիլի 21-ին որոշում է կայացրել, որի համաձայն` նախկին նախագահ Հոսնի Մուբարաքի և նրա կնոջ` Սյուզանի անունները պետք է հանվեն հասարարական օբյեկտների անվանումներից:
Երևանի պետական համալսարանի արևելագիտության ֆակուլտետում Սյուզան Մուբարաքի անվան լսարան կա:
Արևելագիտության ֆակուլտետի արաբագիտության ամբիոնի վարիչ Սոնա Տոնիկյանը «Առաջին լրատվականի» հետ զրույցում նշեց, որ լսարանը վերանորոգել է Եգիպտոսի ԱԳՆ` ԱՊՀ երկրների հետ տեխնիկական համագործակցության հիմնադրամը Եգիպտոսի դեսպանատան միջնորդությամբ, և անվանման առաջարկը նույնպես նրանցն է եղել:
Ամբիոնի վարիչի խոսքերով, ստեղծված նոր իրավիճակում իրենք կխորհրդակցեն նախ համալսարանի համապատասխան կառույցների և Եգիպտոսի դեսպանատան հետ, և եթե դեսպանատունը նախաձեռնի նման փոփոխություն ու ավելի «նեյտրալ» անվանում առաջարկի, իրենք կանվանափոխեն լսարանը:
«Մեր նախաձեռնությամբ չի եղել դա, և բնականաբար պատշաճ չեմ համարում միայնակ այդ որոշումն ընդունել ու վերանվանել: Այս պահին որևէ լուր չենք ստացել եգիպտական կողմից, բայց քանի որ դա իրենց որոշումն է, ապա կարծում եմ նման առաջարկ մեզ կարվի»,- մանրամասնեց Սոնա Տոնիկյանը:
