Վրացական Apsny.ge կայքի փոխանցմամբ, վրաց փորձագետները պահանջում են պատասխանատվության ենթարկել այն անձանց, ովքեր մեղավոր են Ռուսաստանի դեմ Հաագայի դատարան ներկայացրած վրացական հայցի տապալման գործում:
Փորձագետները նշում են, որ այդ հայցն արժանիորեն չի պատրաստվել. «Հայցն այնպիսին էր, որ նախապես դատապարտված էր անհաջողության: Մենք համապատասխան հայտարարությամբ կդիմենք իշխանություններին, որպեսզի մեղավորները պատժվեն:
Դրանով մենք երկու նպատակ ենք հետապնդում. հետագայում նման բաներ չպետք է կրկնվեն և պետք է դրվի հայցը պատրաստողներին պատասխանատվության ենթարկելու հարցը»:
Նշվում է, որ իշխանություններին դիմելու տեքստը կմշակվի մոտ ապագայում:
Հիշեցնենք, որ ապրիլի սկզբին Հաագայի միջազգային դատարանը 10 դեմ, 6 կողմ ձայների հարաբերակցությամբ մերժեց քննել «Վրաստանն ընդդեմ Ռուսաստանի» հայցը: Միևնույն ժամանակ, Հաագայի դատարանը մերժեց (12 դեմ) Ռուսաստանը` որպես հակամարտող կողմ չդիտարկելու ռուսական խնդրագիրը:
