Թուրքական Doğan լրատվական գործակալության փոխանցմամբ, թուրք նախարար, ԵՄ-ին Թուրքիայի լիիրավ անդամակցության գծով գլխավոր բանագնաց Էգեմեն Բաղըշը Սուրբ Զատիկի տոնի կապակցությամբ այցելել է Ստամբուլի Քադըքյոյ շրջանում գտնվող Սուրբ Թագավոր հայկական եկեղեցի:
Սուրբ Զատիկի տոնի կապակցությամբ Բաղըշը շնորհավորել է Սուրբ Թագավոր հայկական եկեղեցու հիմնադրամի նախագահ Շապուհ Չոլաքյանին և հույս հայտնել, որ եկեղեցու սպասավորները կաղոթեն հունիսի 12-ին կայանալիք խորհրդարանական ընտրությունների համար.
«Մենք «պետք» է ընդունենք ու սիրենք միմյանց: Եթե մենք ընդհանուր հայտարարի գանք, ապա այս երկիրը «կդառնա» աշխարհի ամենահարուստ երկիրը»:
88-ամյա Չոլաքյանն իր հերթին նշել է. «Ես հասցրել եմ ապրել Թուրքիայի պատմության տարբեր ժամանակաշրջաններում և ականատես եմ եղել 1955 թվականի սեպտեմբերի 6-7-ը Ստամբուլում կայացած հայերի ու հույների ջարդերին, ինչպես նաև «Ունեցվածքի հարկին»: Եթե Թուրքիան անդամակցի ԵՄ-ին, ապա մեզ առավել լավ օրեր կսպասեն»:
Հիշեցնենք, որ 1942 թվականին թուրքական կառավարությունը, վարչապետ Շուքրու Սարաջօղլուի գլխավորությամբ, թուրքական խորհրդարան ներկայացրեց «Ունեցվածքի հարկ»-ի (Varlık vergisi) մասին օրենքը, որն ընդունվեց 1942 թվականի նոյեմբերի 11-ին` խորհրդարանի նիստին մասնակցող 350 պատգամավորների միաձայն քվեարկությամբ (թիվ 4305 օրենք):
Ի դեպ, դրանից առաջ` 1942 թվականի սեպտեմբերին, ֆինանսների նախարարությունը նահանգների ֆինանսական վարչություններից, բանկերից, անվտանգության ծառայությունից սկսել էր տվյալներ պահանջել փոքրամասնությունների նյութական վիճակի մասին:
«Ունեցվածքի հարկ»-ը, ըստ կրոնական պատկանելության, հարկատուներին բաժանում էր 4 խմբի. ա) մուսուլմաններ, բ) ոչ մուսուլմաններ, գ) հավատափոխներ, դ) օտարահպատակներ:
Օտարահպատակների համար ոչ մուսուլմանների համեմատ ավելի մեղմ հարկաչափ էր սահմանվել, իսկ հավատափոխներն ընդգրկվեցին մուսուլմանների խմբում: Այսինքն՝ գրեթե ստացվել էր հարկատուների երկու խումբ` մուսուլմաններ ու ոչ մուսուլմաններ: Մուսուլմանները պետք է վճարեին ունեցվածքի 12.5 տոկոսի չափով հարկ, ոչ մուսուլմանները՝ 50 տոկոսի, հավատափոխները, այսինքն՝ իսլամացածները, 25 տոկոս և օտարահպատակները՝ 12.5 տոկոս:
«Ունեցվածքի հարկ»-ը գործեց 16 ամիս և վերացվեց 1944 թվականի մարտի 15-ին (թիվ 4530 օրենք): Ընդհանուր առմամբ, հավաքվեց 314.900.000 թուրքական լիրա հարկ, որի 70 տոկոսը` Ստամբուլում, ուր առկա էր հայկական ու հունական ստվար համայնք: Այդ հարկը Թուրքիայում բնակվող բազմաթիվ քրիստոնյաների արտագաղթի պատճառ հանդիսացավ:
