Միջազգային մամուլը լայնորեն անդրադարձել է Ադրբեջանում կայացած խորհրդարանական ընտրություններին:
Լուսաբանելով Ադրբեջանում անցկացվող խորհրդարանական ընտրությունները` Frans Press-ը գրում է. «Նախագահ Իլհամ Ալիեւի գլխավորած «Ենի Ազերբայջան» կուսակցության հաղթանակը ակնհայտ է նախքան ընտրությունների ավարտը, քանի որ վերջիններս, ադրբեջանական ընդդիմության որակմամբ, կեղծված են: Ընդդիմությունն իշխանությանը մեղադրել է նաև նորմալ ընտրություններ անցկացնելու ընդդիմության հնարավորությունները սահմանափակելու մեջ: Ադրբեջանում ավելի շատ դեմոկրատական ազատություններ ձեռք բերելու նպատակով ընդդիմությունը միջազգային հանրությանը իշխանության վրա ներգործելու կոչ է արել: Ընդդիմությունն Արևմուտքին մեղադրել է սեփական հետաքրքրությունների պատճառով մարդու իրավունքների պահպանման հարցում ցածր ցուցանիշների համար Ադրբեջանի իշխանությանը քիչ քննադատելու մեջ: Ընդդիմության օգտին քվեարկած 41-ամյա Շամիլ Գասիմովի կարծիքով, իշխող կուսակցությունը հոգ չի տանում մարդկանց մասին, խորհրդարանում մարդկանց խնդիրները բարձրացնող միակ ուժն ընդդիմությունն է, իսկ մնացածները զբաղված են՝ իշխանությանը գովերգելով միայն: Ընդդիմության կարծիքով, ընտրությունների արդյունքները նախօրոք հայտնի են. դրանց նպատակը Իլհամ Ալիեւի վարչակարգը ամրացնելն է»:
Associated Press-ը այսօր փատել է, որ ցանկացածի համար խորհրդարան մտնելու հնարավորությունը կախված է Ադրբեջանի նախագահական աշխատակազմում նստածների կամքից: «Որոշ ընտրատեղամասերում ընդդիմության դիտորդներին նույնիսկ թույլ չեն տվել մտնել ընտրատարածք: Reuters-ի մատուցմամբ, «Ազգային ճակատ» կուսակցության նախագահ Ալի Քերիմլին քվեարկելուց հետո լրագրողներին հայտարարել է. «Ափսոս, որ այս ընտրությունները զանգվածային կեղծարարություններով են ընթանում: Դրանք Ալիեւի վարչակարգի անցկացրած ամենավատ ընտրություններն են»: «Daily Times»-ի հետ զրույցում Քերիմլին նշել է. «Եվրոպան Ադրբեջանին դիտարկում է միմիայն որպես էներգիայի ստացման աղբյուր, բայց նրանք նաև պետք է հասկանան, որ իրենց տնտեսական շահերը նույնպես վտանգված են, քանի որ Ադրբեջանում ավտորիտար ռեժիմ է տիրում»: Eurasianet.Org-ը ներկայացրել է ընդդիմադիր տրամադրություններ ունեցող Turan ադրբեջանական գործակալության վերլուծաբան Զաֆար Գուլիեի խոսքը. «Հեռուստատեսությամբ ընտրությունների լուսաբանումը եւ թեկնածուների ելույթներն Ադրբեջանի քաղաքացիները շատ անգամ նայում են միմիայն որպես շոու: Նրանց ծիծաղեցնում են նույնիսկ կարդալ չիմացող միմյանց հայհոյող թեկնածուները»: