Լոս Անջելես կատարելիք այցի նախօրեին նախագահ Օբաման տեղեկացել է, որ ԱՄՆ հայկական կազմակերպությունները պատրաստվում են իրեն բողոքի ակցիաներով դիմավորել այդ քաղաքում` պահանջելով նրանից կատարել նախընտրական խոստումը և ճանաչել Հայոց ցեղասպանությունը:
Հարյուրավոր հայեր հավաքվել էին Քալվեր Սիթիում գտնվող Sony Pictures Studio կենտրոնում, ուր ժամանել էր Օբաման: «Սա ժողովրդի ցավի մասին է»,- ցույցի մասին խոսելիս ասել է Վիլյամ Բայրամյանը, որը զբաղեցնում է Ամերիկայի Արևմտյան ափի Հայ դատի գրասենյակի գործադիր տնօրենի պաշտոնը: «Սա այդ տառապանքների դիմաց արդարություն ստանալու համար է»:
Այստեղ հավաքվածների մեծ մասը ժամանակին քվեարկել են Օբամայի օգտին, քանի որ նա խոստացել էր «իրերն անվանել իրենց անուններով», սակայն այդ խոստումը չի կատարել: «Կարող եք այսօր դուք պատկերացնել հրեաների վիճակը, եթե ինչ-որ մեկը կանգնի և ասի, որ Հոլոքոստ չի եղել»,- ասում է Քոքո Բալյանը, որը 2008 թ., առաջին անգամ դեմ գնալով իր սկզբունքներին, չէր քվեարկել հանրապետական թեկնածուի օգտին` ընտրելով Օբամային: «Սա մարդու հիմնարար իրավունք է: Սա այն է, ինչ մենք ուզում ենք: Մենք ասում ենք` պարոն նախագահ, հիշե՛ք, թե ինչ եք խոսացել: Պահե՛ք ձեր խոստումը»:
Ինչպես մենք տեղեկացրել էինք, ցույցին խոստացել էր մասնակցել նաև System of a Down խմբի անդամ Սերժ Թանկյանը, որն էլ կատարեց իր խոստումը: