Թուրքական Hürriyet Daily News and Economic Review թերթի փոխանցմամբ, Թուրքիայի արտգործնախարությունն ու Ազգային հետախուզական կազմակերպությունը (MIT) դիտարկում են այն տեղեկատվությունը, իբրև թե 1970-1980-ական թվականներին 34 թուրք դիվանագետների մահվան պատճառ հանդիսացած ԱՍԱԼԱ-ն (Հայաստանի ազատագրության հայ գաղտնի բանակ) սպառնալից նամակներ է հղել թուրքական դիվանագիտական ներկայացուցչություններին:
Դրանցից առաջինը ստացել է Թբիլիսիում գտնվող Թուրքիայի դեսպանատունը, որը պատասխանատու է Հայաստանին առնչվող խնդիրների համար, քանի որ Երևանում գոյություն չունի թուրքական դեսպանատուն:
Նշվում է, որ մի շարք այլ թուրքական դեսպանատներ նույնպես սպառնալիքներ են ստացել ԱՍԱԼԱ-ից: Սպառնական նամակների մեջ նշված է, որ եթե Հայաստանի վրա Ադրբեջանի հարձակվելու դեպքում Թուրքիան աջակցի Ադրբեջանին, ապա «այդ ցուցակը կհասցվի իր ավարտին»:
Այս ամենը հանգեցրել է նրան, որ աշխարհի տարբեր երկրներում գտնվող թուրքական դեսպանատները դիմել են այդ երկրներին` իրենց անվտանգության բարձրացման հարցով: Դա, մասնավորապես, վերաբերում է հայկական հոծ բնակչություն ունեցող երկրներին` ԱՄՆ, Ֆրանսիա, Լիբանան:
Այժմ Թուրքիայի արտգործնախարարությունն ու MIT-ը համատեղ վերլուծության են ենթարկում այդ սպառնալից հաղորդագրությունները` դրանք համադրելով հայ-ադրբեջանական և հայ-թուրքական վերջին զարգացումների հետ:
Հայերն այժմ նախապատրաստվում են 2015 թվականին Հայոց ցեղասպանության 100-րդ տարելիցին: Հայ երիտասարդության և հատկապես սփյուռքի շրջանում նկատվում է արմատականացման դրսևորումների ուժեղացում: Ցեղասպանության միջազգային ճանաչման հարցում հայերի ապրած հիասթափությունը կարող է հանգեցնել ԱՍԱԼԱ-ի վերածնմանը»:
Հիշեցման կարգով նշվում է, որ 1975-1986 թվականներին ԱՍԱԼԱ-ն իր վրա է վերցրել 200 թուրքական դիվանագիտական և ոչ դիվանագիտական կառույցների դեմ իրագործված հարձակումները, ինչի արդյունքում զոհվել են 58 դիվանագետներ: Նրանցից 34-ը թուրքեր են եղել:
Մինչև 1980-ական թվականները ԱՄՆ-ը ԱՍԱԼԱ-ին ներառել էր ահաբեկչական կազմակերպությունների շարքում, բայց նրա գործունեության դադարեցումից հետո ԱՍԱԼԱ-ի անունը հանվել է այդ ցուցակից:
