Ռուսաստանյան «Հասարակական կարծիք» հիմնադրամի կողմից անցկացված հարցումները վկայում են, որ Ռուսաստանի Դաշնության նախագահ Դմիտրի Մեդվեդևի և վարչապետ Վլադիմիր Պուտինի վարկանիշներն ամենացածրն են դիտարկումների սկզբից: Այս մասին գրում է Ведомости թերթը:
2010 թ. հունվարից, երբ այդ կազմակերպությունն անցկացրել էր իր վերջին հարցումը, վարչապետ Պուտինի վարկանիշն ընկել է 69%-ից մինչև 53%, իսկ Մեդվեդևինը` 62%-ից 46%: Անկում է նկատվում նաև իշխող «Եդինայա Ռոսիա» կուսակցության վարկանիշային տվյալներում: Այն այժմ կազմում է 44%, որքան եղել է երկու տարի առաջ: Ավելացել են նաև նրանք, ովքեր հայտարարել են, թե երբեք չեն քվեարկի այդ կուսակցության օգտին` 29%-ից այդ թիվը հասել է 38%-ի:
«Լևադա» կենտրոնի անցկացրած հարցումն էլ վկայում է, որ վերջին երկու տարվա մեջ աճել է կոմունիստների վարկանիշը` 12%-ից հասնելով 18%-ի:
