Հատուկ քննչական ծառայությունը Սերժ Սարգսյանի հրահանգից հետո երեկ հայտարարություն է տարածել, որով փնտրում է Մարտի 1-ի դեպքերի նոր ականատեսների: Իսկ նրանց այդ գաղափարը հուշել էր Սերժ Սարգսյանը` հայտարարելով. «Արդեն տևական ժամանակ է անցել, միգուցե մարդիկ կան, ովքեր ականատես են եղել և այն ժամանակ չէին ուզում համագործակցել իրավապահ մարմինների հետ, իսկ հիմա այլ մոտեցումներ ունեն»: Տեսնես` ի՞նչ նոր մարդիկ են հայտնվելու Մարտի 1-ի գործի քննության գործընթացում: Ի՞նչ են ասելու նրանք, որ այս երեք տարվա ընթացքում չէին ուզում ասել: Կամ` ի՞նչն է փոխվել այս ընթացքում նրանց համար, որ նախկինում չէին ուզում գործակցել իրավապահների հետ, իսկ այժմ կարող են այլ մոտեցումներ ունենալ, ինչպես Սերժ Սարգսյանն է ասում:
Եվ արդյոք նա այդ մասին հիպոթետի՞կ է ասում, թե՞ ասում է միանգամայն քաջատեղյակ լինելով, որ այդպիսի մարդիկ կան, գոյություն ունեն և սպասում էին այդ մեսիջին: Դա, իհարկե, ժամանակը ցույց կտա: Բայց այն, որ Հատուկ քննչական ծառայությունը Սերժ Սարգսյանի այդ մեսիջից անմիջապես հետո ականատեսների «հրավեր» է հղում` հիմք է տալիս ենթադրելու, որ իշխանությունը երկար է պահել այդ ականատեսներին ու հիմա այլևս ժամանակ չունի պահելու: Այս ամենն, իհարկե, ավելի շատ ծուղակ է հիշեցնում, որովհետև կարծես թե չափից շատ միանգամից և չափից շատ անկեղծ հալվեց իշխանության կարծր դիրքորոշումը մարտի 1-ի հարցում: Հենց դա էլ կասկած է հարուցում, որ իրականում կարող է այդ «հալոցքի» տակ լինել պարզապես «ջրհեղեղի» վտանգ, որով իշխանությունը ցանկանում է ողողել ինչ-որ անցանկալի երևույթներ կամ զարգացումներ:
Ի վերջո, մարտի 1-ի գործընթացն ունեցել է Փաստահավաք խումբ, որն այդ ընթացքում,- իհարկե իր ընդդիմադիր անդամների ջանքերով,- հավաքել է բավական մեծ ծավալի նյութեր, դրանք ներկայացրել 5 առանձին զեկույցների տեսքով: Եվ հիմա հարց է առաջանում` խնդիրը այդ նյութերն առավել պրոֆեսիոնալ, ամբողջական, անաչառ դիտարկման և ուսումնասիրության ենթարկե՞լն է` առավել ճշգրիտ հետևություններ և բացահայտումներ անելու համար, թե՞ ինչ-որ նոր ականատեսների լսելը: Հենց այդ հարցում է, որ «նոր ականատեսների» գաղափարը որոշակիորեն ծուղակային է թվում, թվում է մի գաղափար, որը կարող է բացահայտման նոր թափ անվան տակ իրականում խճճել արդեն իսկ բացահայտվածը, որը թերևս ընդամենը կարիք ունի առավել անաչառ և մասնագիտական դիտարկման և եզրահանգումների: