Քիչ առաջ հաղորդագրություն է տարածել ԱԱԾ մամուլի կենտրոնը: «Հայաստանի եւ Վրաստանի հատուկ ծառայությունների համագործակցության շրջանակներում ՀՀ-ում Ազգային անվտանգության մարմինների կողմից վերոնշյալ գործարքին առնչություն ունենալու կասկածանքով ապրիլին ձերբակալվել է ՀՀ քաղաքացի Գարիկ Դադայանը: Ներկայումս վերջինիս նկատմամբ հարուցվել է քրեական գործ` ՀՀ քր. օր-ի 215 հոդվածի 2-րդ մասով` ռադիոակտիվ նյութերի մաքսանենգություն հատկանիշով: Վերոհիշյալ հանցագործության բացահայտման ընթացքում Հայաստանի և Վրաստանի հատուկ ծառայությունների միջեւ իրականացվել է սերտ համագործակցություն»,-ասվում է ԱԱԾ մամուլի կենտրոնի տարածած հաղորդագրության մեջ:
Հիշեցնենք, որ ինչպես տեղեկացրել էր «Առաջին լրատվական»-ը, The Guardian պարբերականը կիրակի օրը հոդված էր տպագրել, համաձայն որի՝ Հայաստանի երկու քաղաքացիներ` Սմբատ Տոնոյանն ու Հրանտ Օհանյանը ապօրինի ճանապարհով Երեւանից Վրաստան են տեղափոխել հարստացված ուրան, որը կարող է օգտագործվել միջուկային զենք պատրաստելու համար: Այս մասին Վրաստանի նախագահ Սահակաշվիլին ապրիլին Վաշինգտոնում տեղի ունեցած միջուկային գագաթնաժողովի ժամանակ տեղեկացրել էր այլ երկրների ղեկավարներին:
