Արդեն մի քանի օր է՝ ադրբեջանական կողմը շարունակում է հայ-ադրբեջանական սահմանին (այդ թվում՝ արցախյան շփման գծում) խախտել հրադադարի պահպանման ռեժիմը: Թշնամին կրակում է անգամ Տավուշի մարզի սահմանամերձ գյուղերի խաղաղ բնակիչների ուղղությամբ:
Ուշագրավ է, որ սահմանային այս լարվածությունը համընկավ Ռուսաստանի արտգործնախարար Սերգեյ Լավրովի Բաքու կատարած այցի օրերի հետ: Փաստորեն խաղաղության կողմնակից Ռուսաստանի բարձր մակարդակով ներկայությունը Բաքվում չի ընկճում թշնամուն դիմել ռազմական գործողությունների:
«Առաջին լրատվական»-ի հետ զրույցում ռուսաստանցի հայտնի քաղաքագետ, Պետդումայի նախկին պատգամավոր Սերգեյ Մարկովի կարծիքով՝ ոչ մի կերպ չի կարելի Լավրովի այցի հետ կապել սահմանային լարված իրավիճակը. «Սերգեյ Լավրովը խաղաղության և ոչ պատերազմի կողմնակից է: Երկրորդ՝ Ռուսաստանը բոլոր ջանքերը ներդնում է, որպեսզի ղարաբաղյան հակամարտությունը խաղաղ կարգավորվի և ոչ պատերազմի միջոցով»,- ընդգծեց նա:
Սերգեյ Մարկովը նաև մի ուշագրավ դիտարկում արեց՝ նշելով, որ սահմանային լարված իրավիճակը պայմանավորված է ոչ թե անմիջական ղեկավարների հրամանով, այլ հենց սահմանին կանգնած զինվորների միջև առկա որոշակի խնդիրներով. «Այսինքն՝ ոչ թե գեներալներն ու ղեկավարությունն են հրաման տալիս, այլ զինվորների միջև կոնֆլիկտ է հասունանում, հետո դա փոխանցվում է երկու կողմերի սպաներին և այդպես շարունակ: Իմ կարծիքով՝ երկրի ղեկավարությունը կրակելու հրաման չի տալիս, ըստ իս՝ երկու կողմից էլ պարզապես հրաման կա պատասխանելու, իսկ ինչ որ առաջանում է սահմանին, անմիջական ղեկավարության հրամանով չի լինում»,- ասաց մեր զրուցակիցը:
Միևնույն ժամանակ, Սերգեյ Մարկովն ընդգծեց, որ լայնամասշտաբ պատերազմի վերսկսումը քիչ հավանական է. «Ես կարծում եմ՝ ո՛չ Հայաստանին, ո՛չ Ադրբեջանին ձեռնտու չէ լայնամասշտաբ պատերազմի վերսկսումը: Ավելին՝ Հայաստանին ներկայիս ստատուս քվոն նույնիսկ բավարարում է, իսկ Ադրբեջանը եթե պատերազմ սկսի, տնտեսական մեծ կորուստներ կունենա, տնտեսական զագացումը կանգ կառնի»,- ասաց Սերգեյ Մարկովը:
Քաղաքագետը նշեց, որ նմանատիպ լարված իրավիճակը և շարունակական կրակոցները հնարավոր է՝ վատ հետևանքներ ունենան երկու կողմերի համար: