Լուրեր
Ջրի բաժանորդ 150-200 հազար դրամով. գյուղացիները դիմում են նախագահին և վարչապետին

«Առաջին լրատվական»-ը ներկայացնում է «Բողոք երկրի սրտից» հաղորդաշարի հերթական թողարկումը: Երկրի սրտում՝ Հանրապետության հրապարակում, իր բողոքն է հայտնում Ռուզաննա Կարապետյանը: Նա դժվարությամբ է  կարողանամ երեխաների ծախսը հոգալ:

«Ապրում ենք  ուրիշի հողամասի վրա տեղադրված տնակում»,- ասաց Ռուզաննա Կարապետյանը, ապա պատմեց, որ այժմ քաշքշուկների մեջ է «Ջրմուղկոյուղու» պատճառով: Ասաց, որ մի քանի ամիս առաջ դիմել է իրենց համայնքի տեսուչին՝ ջրագիծ քաշելու խնդրանքով, իրեն պատասխանել են, որ  պետք է ջրագիծը իր միջոցներով քաշի: «Ջրագիծ իմ ծախսերով քաշեցի, դիմեցի կրկին տեսուչ Հովհաննեսին, ասաց՝ հաշվիչ տեղադրեմ և կդառնամ բաժանորդ: Հաշվիչը տեղադրելուց հետո ասաց՝ 150 հազար դրամ պիտի տամ, որ ջրի բաժանորդ  լինեմ: Գնացի  Երևան՝  «Երևանջուր», ասացին, որ ակտավորել են՝ 150 հազար  դրամ»,- մանրամասնեց նա:

Տիկին Ռուզաննան պատմեց, որ դիմել են դատարան, ակտը  չեղարկվել է, որից հետո կրկին դեմել է «Ջրմուղ»՝ բաժանորդ դառնալու համար, նշել են, որ 15 օրվա ընթացքում ջրագիծ կքաշեն, կապահովեն ջրամատակարարմամբ, բայց արդեն 2 ամսից ավել է անցել, չեն գալիս, զանգերին չեն պատասխանում: «Փաստորեն, հիմա  ջուրը միայն  հարուստների համար է: Խնդրում եմ նախագահին, վարչապետին, որ այս խնդրին լուծում տան, մեր ամբողջ թաղամասում այս խնդիրը  կա»,- նշեց նա:

«Առաջին լրատվական»-ի հաղորդաշարի ընթացքում «Իրավաբանների և հոգեբանների միջազգային ասոցիացիա» ՀԿ նախագահ Խաչատուր Մարոզյանը նկատեց, որ Գեղանիստ համայնքից նմանատիպ  շատ դիմումներ կան: Ըստ նրա՝ Գեղանիստ, Արբաթ, Հայանիստ համայնքներում ջրի խնդիրն առկա է, և արդեն գործելաոճ է դարձել բնակիչներին ծուղակը գցելն ու տուգանելը՝ 150, անգամ մինչև 600 հազար դրամ:

 

Մանրամասները՝ տեսանյութում:

  • Դիտումներ՝ *